मुंबई-राष्ट्रवादीचे अध्यक्ष शरद पवार यांच्यावर अत्यंत खालच्या पातळीवर फेसबूक पोस्ट करणारी अभिनेत्री केतकी चितळे हिला ठाणे पोलिसांनी नवी मुंबईतील कळंबोली येथून आज सायंकाळी ताब्यात घेतले आहे. शरद पवारांवरील केलेल्या पोस्टनंतर तिच्यावर सर्व थरातून टीका होत आहे.
शरद पवार यांच्यावर पोस्ट केल्याप्रकरणी केतकी चितळेविरुद्ध कळवा पोलीस ठाण्यात गुन्हाही नोंद झाला आहे. बदनामी करणे आणि माहिती तंत्रज्ञान कायद्याची कलमे तिच्याविरुद्ध लावण्यात आली आहे. ठाणे पोलिसांनी ही कारवाई केली असून आक्षेपार्ह पोस्टचे प्रकरण तिच्या अंगलट आले आहे.
शरद पवारांबद्दल केलेल्या आक्षेपार्ह पोस्टनंतर केतकी चितळेवर राज ठाकरेंपासून राष्ट्रवादीच्या अनेक नेत्यांनी तिच्यावर कारवाई करावी अशी मागणी केली होती. त्यानंतर आता पोलिसांनीही तिला ताब्यात घेतले आहे.अभिनेत्री केतकी चितळेने आपल्या फेसबूक पोस्टमध्ये राष्ट्रवादी काँग्रेसचे अध्यक्ष शरद पवारांनी अत्यंत वाईट भाषेत टीका केली. पोस्टच्या खाली -Advocate Nitin Bhave असे नाव या पोस्टमध्ये लिहिले आहे. पण याच पोस्टमध्ये आठ ओळीत शरद पवारांबाबत असभ्य भाषा केली गेली आहे. या प्रकरणी मुंबईतील कळवा पोलिस स्टेशनमध्ये 153 आणि 505 अंतर्गतगुन्हा दाखल करण्यात आला. गुन्हा दाखल झाल्याने केतकीच्या अडचणींमध्ये वाढ झाली असून आता पोलिसांनीही तिला ताब्यात घेतले आहे.
