‘विद्यार्थ्यांच्या भविष्याचा प्रश्न आता मुख्यमंत्र्यांच्या इगोचा खेळ बनला’; पुण्यातील आंदोलनातून सरकारवर हल्लाबोल
पुणे : महाराष्ट्र लोकसेवा आयोगाच्या अध्यक्षांच्या राजीनाम्यासह विविध मागण्यांसाठी पुण्यात सुरू असलेल्या विद्यार्थ्यांच्या आंदोलनाला आता नवे वळण मिळाले आहे. राष्ट्रवादी काँग्रेस (शरदचंद्र पवार) पक्षाचे आमदार रोहित पवार यांनी MPSC अध्यक्ष विवेक भीमनवार यांनी आपला राजीनामा मुख्यमंत्री देवेंद्र फडणवीस यांच्याकडे पाठवल्याचा दावा केला आहे. हा राजीनामा अद्याप स्वीकारला जात नसल्याने विद्यार्थ्यांच्या भविष्याचा प्रश्न आता केवळ ‘इगोचा खेळ’ बनल्याचा आरोप त्यांनी केला.
रोहित पवार म्हणाले की, “परवा संध्याकाळी साडेसात ते आठच्या दरम्यान भीमनवार यांनी आपला राजीनामा मुख्यमंत्री देवेंद्र फडणवीस यांच्याकडे पाठवला. मात्र केवळ मुख्यमंत्र्यांकडे राजीनामा पाठवून प्रश्न सुटणार नाही. नियमानुसार तो राज्यपालांकडे जाणे आवश्यक आहे.”
‘राजीनामा देऊन विषय मुख्यमंत्र्यांच्या कोर्टात टाकला’
भीमनवार यांनी राजीनामा थेट मुख्यमंत्र्यांकडे पाठवून स्वतःची जबाबदारी बाजूला करण्याचा प्रयत्न केला असावा, असा आरोप रोहित पवार यांनी केला.
“मी राजीनामा दिला आहे, आता मला वाचवायचे की नाही ते तुम्ही ठरवा, अशा प्रकारे विषय मुख्यमंत्र्यांच्या कोर्टात टाकण्यात आला आहे,” असे ते म्हणाले.
‘हा विद्यार्थ्यांच्या भविष्याचा नव्हे, इगोचा प्रश्न झाला’
राजीनाम्यावर निर्णय का होत नाही, यावरूनही रोहित पवार यांनी मुख्यमंत्री फडणवीसांवर निशाणा साधला.
विद्यार्थ्यांच्या आंदोलनाच्या दबावामुळे अध्यक्षांचा राजीनामा स्वीकारल्यास पुढे सामान्य नागरिक इतर मंत्री किंवा मुख्यमंत्र्यांचाही राजीनामा मागू शकतात, अशी भीती सरकारला वाटत असावी, असा दावा त्यांनी केला.
“आता हा विषय विद्यार्थ्यांच्या भविष्याचा राहिलेला नाही. तो मुख्यमंत्र्यांच्या इगोचा खेळ बनला आहे,” अशी टीका रोहित पवार यांनी केली.
कलम 317 अंतर्गत चौकशीची प्रक्रिया
दरम्यान, मुख्यमंत्री देवेंद्र फडणवीस यांनी MPSCच्या आजी-माजी अध्यक्ष आणि सदस्यांबाबत संविधानाच्या कलम 317 अंतर्गत कारवाईसाठी निवृत्त उच्च न्यायालय न्यायाधीशांच्या अध्यक्षतेखाली समिती नेमण्याची शिफारस राज्यपालांकडे केली आहे. तीन महिन्यांत अहवाल मागवून त्यानुसार पुढील कारवाई करण्याची भूमिका सरकारने घेतली आहे. Politics News on Sarkarnama
आंदोलनात राजीनाम्याची मागणी केंद्रस्थानी
पुण्यात सुरू असलेल्या MPSC विद्यार्थ्यांच्या आंदोलनात आयोगाध्यक्षांच्या राजीनाम्याची मागणी प्रमुख आहे. परीक्षा प्रक्रियेतील पारदर्शकता, पेपरफुटीच्या आरोपांची चौकशी, भरती प्रक्रिया आणि इतर मागण्यांसाठी विद्यार्थी आंदोलन करत आहेत.
रोहित पवार यांच्या नव्या दाव्यानंतर आता भीमनवार यांच्या कथित राजीनाम्यावर सरकार आणि राजभवन नेमकी काय भूमिका घेतात, याकडे विद्यार्थ्यांसह राज्याचे लक्ष लागले आहे.
