‘पोलिसी दडपशाही थांबवा, मुख्यमंत्र्यांनी स्वतः विद्यार्थ्यांशी संवाद साधावा’
मुंबई : आपल्या मागण्यांसाठी मुंबईतील आझाद मैदानावर आंदोलनासाठी येणाऱ्या आदिवासी विद्यार्थ्यांना मध्यरात्री रस्त्यातच अडवून त्यांना धमकावण्यात आल्याचा गंभीर आरोप काँग्रेस नेते विजय वडेट्टीवार यांनी केला आहे. विद्यार्थ्यांचा आवाज दाबण्यासाठी पोलिसांचा वापर केला जात असल्याचा दावा करत ही दडपशाही तातडीने थांबवावी आणि मुख्यमंत्री देवेंद्र फडणवीस यांनी स्वतः विद्यार्थ्यांशी संवाद साधावा, अशी मागणी त्यांनी केली.
वडेट्टीवार यांनी सोशल मीडियावरील पोस्टमधून राज्य सरकार आणि पोलिस प्रशासनाच्या भूमिकेवर प्रश्न उपस्थित केले. “आदिवासी विद्यार्थी आपल्या मागण्या शांततेच्या मार्गाने मांडण्यासाठी आझाद मैदानावर येत होते. मात्र त्यांना रात्री तीन वाजता वाटेतच अडवण्यात आले. ही कुठल्या प्रकारची लोकशाही?” असा सवाल त्यांनी केला.
विद्यार्थ्यांचे फोटो काढण्यात आले, “तुमच्यावर केसेस करू” अशा शब्दांत धमकावण्यात आले आणि विद्यार्थ्यांना घेऊन येणारी बसही ताब्यात घेण्यात आल्याचा आरोप वडेट्टीवार यांनी केला.
‘आंदोलन सुरू होण्याआधीच चिरडण्याचा प्रयत्न का?’
एखादे आंदोलन सुरू होण्याआधीच ते अशा पद्धतीने रोखण्याचा प्रयत्न होत असेल, तर सरकार नेमके कशाला घाबरत आहे, असा प्रश्नही वडेट्टीवार यांनी उपस्थित केला.
आदिवासी विकास मंत्री आणि संबंधित आयुक्तांच्या राजीनाम्याची मागणी करण्याचा विद्यार्थ्यांना घटनात्मक अधिकार आहे. त्यांच्या मागण्यांवर चर्चा करण्याऐवजी पोलिसी बळाचा वापर करून विद्यार्थ्यांचा आवाज दाबण्याचा प्रयत्न केला जात असल्याचा आरोप त्यांनी केला.
मुख्यमंत्र्यांना थेट आवाहन
विजय वडेट्टीवार यांनी मुख्यमंत्री देवेंद्र फडणवीस यांना थेट आवाहन करत, “मुख्यमंत्री साहेब, तुम्ही स्वतः या विद्यार्थ्यांना भेटा. त्यांचे म्हणणे ऐकून घ्या आणि त्यांच्यावर सुरू असलेली पोलिसी दडपशाही त्वरित थांबवा,” अशी मागणी केली.
आदिवासी विद्यार्थ्यांच्या मागण्यांवर सरकारने संवादातून तोडगा काढावा आणि आंदोलन करण्याच्या त्यांच्या अधिकारात अडथळे निर्माण करू नयेत, अशी भूमिका वडेट्टीवार यांनी मांडली.
