पुणे जिल्ह्यातील चार व्यक्ती नेपाळमध्ये अडकल्या होत्या आणि त्या सर्व सुरक्षित असून जिल्हा नियंत्रण कक्षाच्या संपर्कात आहेत. त्यापैकी स्मिता पवार या पुण्याच्या आहेत, तर इतर तीन व्यक्ती त्यांच्या नातेवाईक आहेत; त्यापैकी दोन मुंबई आणि एक अहिल्यानगर येथील असल्याचे नमूद आहे.ही माहिती 26 ऑगस्ट रोजी सायंकाळी 5 वाजता मंत्रालय नियंत्रण कक्षाला कळवण्यात आली असून पुढील कार्यवाहीसाठी राष्ट्रीय आपत्ती व्यवस्थापन नियंत्रण कक्षालाही माहिती देण्यात आली आहे.पुणे जिल्ह्यातील आणखी कोणी नागरिक किंवा पर्यटक नेपाळमध्ये अडकले असल्यास त्यांच्या कुटुंबीयांनी जिल्हा नियंत्रण कक्ष — टोल फ्री 1077 / 020-26123371 / 9370960061 येथे संपर्क साधावा, असे आवाहन करण्यात आले आहे
ग्लेशियर कोसळल्याने भूकंपासारखा 5.2 तीव्रतेचा धक्का; , भारताकडून 10 टन मदत
काठमांडू : नेपाळ-तिबेट सीमेवर बुधवारी आलेल्या भीषण अचानक पुरामुळे मोठी जीवितहानी झाली आहे. नेपाळमध्ये आतापर्यंत 162 मृतदेह सापडले असून तिबेटमध्ये तीन जणांच्या मृत्यूची पुष्टी झाली आहे. दोन्ही भागांत मिळून हजाराहून अधिक नागरिक आणि पर्यटकांचा अद्याप शोध सुरू असून मृतांचा आकडा आणखी वाढण्याची भीती व्यक्त केली जात आहे.
नेपाळमधील रसुवा, नुवाकोट, धादिंग, चितवनसह अनेक भागांना पुराचा जबर फटका बसला आहे. नेपाळ पोलिसांच्या माहितीनुसार चितवनमध्ये सर्वाधिक 64 मृतदेह सापडले असून धादिंगमध्ये 27, नवलपरासी पूर्वमध्ये 22, गोरखामध्ये 20 आणि इतर भागांतही मृतदेह सापडले आहेत. हजारो सुरक्षा कर्मचारी शोध आणि बचावकार्यात सहभागी झाले आहेत.
तिबेटच्या ग्यिरोंग काउंटीमध्ये 558 जण बेपत्ता असून त्यात सुमारे 260 परदेशी नागरिकांचा समावेश असल्याचे चीनच्या सरकारी माध्यमांनी म्हटले आहे. पुरानंतर निर्माण झालेल्या धोकादायक परिस्थितीमुळे चीननेही मोठ्या प्रमाणावर बचाव पथके तैनात केली आहेत.
21 भारतीयांची सुखरूप सुटका
नेपाळी लष्कराने गुरुवारी सकाळी रसुवा जिल्ह्यातील टिमुरे भागातून 116 जणांना सुरक्षित बाहेर काढले. त्यामध्ये 95 नेपाळी आणि 21 भारतीय नागरिकांचा समावेश आहे. याशिवाय बोगद्यात अडकलेल्या सात नेपाळी नागरिकांनाही वाचवण्यात आले. खराब हवामान आणि रस्ते तुटल्यामुळे हेलिकॉप्टरद्वारे मोठ्या प्रमाणावर बचावकार्य सुरू आहे.
भारतीय नागरिकांबाबतही विविध यंत्रणांकडून वेगवेगळे आकडे समोर येत आहेत. सकाळच्या काही अहवालांनुसार 133 भारतीय अद्याप संपर्काबाहेर किंवा बेपत्ता असल्याचे सांगण्यात आले आहे. यामध्ये कैलास मानसरोवर यात्रेला गेलेल्या यात्रेकरूंचाही समावेश असल्याची माहिती आहे.
भूकंप नव्हे; ग्लेशियर कोसळल्याने हादरली जमीन
या दुर्घटनेनंतर सुरुवातीला नेपाळ-चीन सीमेवर भूकंप झाल्याचे मानले जात होते. मात्र अमेरिकेच्या यूएस जिऑलॉजिकल सर्व्हेने (USGS) नंतर स्पष्ट केले की नोंदवण्यात आलेला सुमारे 5.2 तीव्रतेचा भूकंपीय सिग्नल प्रत्यक्ष भूकंपामुळे नव्हता. हिमनदीचा मोठा भाग कोसळून त्यासोबत बर्फ, खडक आणि मातीचा प्रचंड ढिगारा खाली आल्याने जमीन हादरली आणि त्यातून विनाशकारी पूर निर्माण झाला.
बर्फ आणि खडकांचा ढिगारा ल्हेंदे खोला नदीच्या प्रवाहात कोसळल्यानंतर काही काळ पाण्याचा प्रवाह अडला आणि त्यानंतर प्रचंड वेगाने पाणी, चिखल व दगडांचा लोंढा खाली आला. या पुराच्या लाटेने टिमुरेसह अनेक वस्त्या, रस्ते, पूल आणि जलविद्युत प्रकल्प उद्ध्वस्त केले.
बिहार-उत्तर प्रदेशमध्ये सतर्कता
नेपाळमधून खाली येणाऱ्या पाण्याच्या पार्श्वभूमीवर भारतातील सीमावर्ती भागातही प्रशासन सतर्क झाले आहे. उत्तर प्रदेशातील महाराजगंज आणि कुशीनगर जिल्ह्यांमध्ये गंडक आणि नारायणी नद्यांच्या पाणीपातळीवर विशेष लक्ष ठेवण्याचे निर्देश देण्यात आले आहेत.
बिहारमध्येही गंडक नदीच्या पातळीवर बारकाईने लक्ष ठेवले जात आहे. 26 ऑगस्टच्या उपलब्ध सरकारी आकडेवारीनुसार गंडक नदी काही ठिकाणी इशारा किंवा धोक्याच्या पातळीच्या आसपास अथवा त्यापेक्षा वर होती. त्यामुळे पश्चिम चंपारण, गोपालगंज, मुझफ्फरपूर आणि वैशालीसह नदीकाठच्या भागांमध्ये खबरदारी घेतली जात आहे.
भारताकडून 10 टन मदत
या भीषण आपत्तीच्या पार्श्वभूमीवर भारताने नेपाळसाठी 10 टन मानवतावादी मदत आणि अत्यावश्यक औषधे पाठवली आहेत. पूरग्रस्तांच्या बचाव आणि मदतकार्याला भारत सर्वतोपरी सहाय्य करेल, असे परराष्ट्र मंत्री एस. जयशंकर यांनी म्हटले आहे.
दरम्यान, हवामान प्रतिकूल असून अनेक रस्ते आणि पूल वाहून गेल्याने दुर्गम भागांपर्यंत पोहोचण्यात बचाव पथकांना अडचणी येत आहेत. हेलिकॉप्टर, ड्रोन तसेच लष्कर आणि आपत्ती व्यवस्थापन पथकांच्या मदतीने बेपत्ता नागरिकांचा शोध सुरू आहे. मृत आणि बेपत्ता नागरिकांचे आकडे बचावकार्य पुढे सरकत असताना वाढण्याची शक्यता आहे
