पाच लाख वृक्ष लागवडीचा टप्पा केला पार; सुयश चॅरिटेबल ट्रस्टची मोठी कामगिरी
पुणे : सुयश चॅरिटेबल ट्रस्टने पर्यावरण संवर्धनाच्या दिशेने एक महत्त्वपूर्ण टप्पा गाठत पाच लाख वृक्ष लागवडीचा टप्पा यशस्वीरित्या पूर्ण केला आहे. पुणे, नंदुरबार, वाशिम, गडचिरोली या जिल्ह्यांसह राजस्थान आणि आसाम या राज्यांमध्ये विविध ठिकाणी वृक्ष लागवड करून संस्थेने हरित पर्यावरणाचा संदेश समाजापर्यंत पोहोचविला.
सुयश चॅरिटेबल ट्रस्टच्या या उपक्रमामध्ये स्थानिक नागरिक, स्वयंसेवक, विद्यार्थी, सामाजिक कार्यकर्ते, शेतकरी तसेच आदिवासी बांधवांनी उत्स्फूर्त सहभाग नोंदविला. पर्यावरणाचा समतोल राखण्यासाठी आणि भावी पिढ्यांना स्वच्छ, निरोगी व समृद्ध पर्यावरण मिळावे या उद्देशाने ही वृक्ष लागवड मोहीम राबविण्यात आली.
वाढते प्रदूषण, जंगलतोड आणि हवामान बदलाच्या पार्श्वभूमीवर वृक्ष लागवडीचे महत्त्व अधिक अधोरेखित होत आहे. याची जाणीव ठेवून सुयश चॅरिटेबल ट्रस्ट गेल्या अनेक वर्षांपासून सातत्याने वृक्षारोपण आणि वृक्षसंवर्धनाचे कार्य करत आहे. लागवड केलेल्या रोपांचे संगोपन व संरक्षण यावरही संस्था विशेष भर देत आहे.
संस्थेचे संस्थापक अध्यक्ष यशवंत घैसास आणि स्मिता घैसास कार्याध्यक्ष शलाका घैसास यांनी या उपक्रमाची माहिती दिली. त्यांनी सांगितले की, “वृक्ष लागवड ही केवळ मोहीम नसून पर्यावरण रक्षणासाठीची सामूहिक जबाबदारी आहे. प्रत्येक नागरिकाने किमान एक वृक्ष लावून त्याचे संगोपन करण्याचा संकल्प केला, तर पर्यावरण संवर्धनाची चळवळ अधिक व्यापक आणि प्रभावी होईल.”
“सुयश चॅरिटेबल ट्रस्टच्या माध्यमातून महाराष्ट्रासह राजस्थान आणि आसाममध्ये हरित संदेश पोहोचविण्याचा आमचा प्रयत्न आहे. पर्यावरण संवर्धनासाठी गेल्या ५० वर्षांपासून ट्रस्ट सातत्याने कार्यरत असून, आज पाच लाखांहून अधिक वृक्ष लागवडीचा टप्पा गाठणे ही आमच्यासाठी अभिमानाची बाब आहे. आगामी काळातही वृक्षारोपण आणि वृक्षसंवर्धनाची ही चळवळ अधिक व्यापक करण्याचा आमचा संकल्प आहे.”
– शलाका घैसास
कार्याध्यक्ष, सुयश चॅरिटेबल ट्रस्ट
