– पहिल्या श्रेणीतील शहरांत सोन्याच्या मागणीत २८ टक्के वाढ, तर दुसऱ्या श्रेणीतील शहरांत ३७ टक्के वाढ
– पहिल्या श्रेणीतील शहरांमध्ये प्रेशियस मेटलमध्ये ३४ टक्के आणि दुसऱ्या श्रेणीतील शहरांत ४४ टक्के वाढ
– दिल्लीत चांदीच्या नाण्यांची लोकप्रियता कायम, एकूण मागणीत दिल्लीचा ५० टक्के भाग
– चांदीच्या सजावटीच्या वस्तूंच्या सर्चेसमध्ये बेंगळुरू आघाडीवर, त्यापाठोपाठ मुंबई आणि दिल्लीचा क्रमांक
मुंबई, १९ ऑक्टोबर – धनत्रयोदशीच्या पार्श्वभूमीवर सोन्या- चांदीच्या (प्रेशियस मेटल) मागणीत ४० टक्के (वार्षिक पातळीवर) वाढ झाली असून सणासुदीच्या निमित्ताने एकंदर मागणीत सोन्याचा वाटा ७० टक्के असल्याचे जस्टडायल ग्राहक अहवालात नमूद करण्यात आले आहे.
दुसऱ्या श्रेणीतील शहरांमध्ये प्रेशियस मेटलला असलेली मागणी वाढली असून पहिल्या व दुसऱ्या श्रेणीतील शहरांमध्ये असलेल्या मागणीत ४४ टक्के वाढ झाली आहे. पहिल्या श्रेणीतील शहरांत सोन्या- चांदीच्या सर्चेसमध्ये ३४ टक्के वाढ झाली आहे. किंमती स्थिर होत असतानाच सोन्याला सर्वाधिक मागणी असून त्यात ३४ टक्के (वार्षिक) वाढ, चांदीमध्ये १४० टक्के, प्लॅटिनममध्ये ८२ टक्के वाढ झाली आहे, तर हिऱ्यांना असलेली मागणी स्थिर आहे.
गेल्या वर्षी धनत्रयोदशीमध्ये सोन्याच्या मागणीत चांदीच्या तुलनेत तीन पटींची वाढ झाली होती, तर यंदा ही मागणी चार पटींवर पोहोचली आहे. मागणीत वाढ झाल्यामुळे देशभरातील रिटेलर्समध्ये उत्साहाचे वातावरण आहे.
ग्राहकांमधील ट्रेंडविषयी जस्टडायलचे सीएमओ श्री. प्रसून कुमार म्हणाले, ‘किमती कमी झाल्यामुळे सोन्याच्या मागणीत वाढ झाली आहे. पहिल्या श्रेणीतील शहरांत असलेल्या मागणीत २८ टक्के, तर दुसऱ्या श्रेणीतील शहरांतून येणाऱ्या मागणीत ३७ टक्के वाढ झाली आहे. दुसऱ्या श्रेणीतील शहरांतील सोन्याच्या मागणीत लक्षणीय वाढ झाली असून त्यामागे वाढलेली क्रयशक्ती आणि महत्त्वाकांक्षा ही कारणे आहेत. चांदीचीया मागणीतही वाढ झाली असून देशभरात २.४ पटींची वाढ दिसून येत आहे. या मागणीमुळे रिटेलर्ससाठी ही दिवाळी उत्साहवर्धक ठरेल असा आमचा अंदाज आहे.’
सोन्याच्या दागिन्यांना असलेल्या मागणीवर पहिल्या श्रेणीतील शहरांपैकी मुंबई, हैद्राबाद, दिल्ली आणि बेंगळुरू यांचे वर्चस्व आहे. सोन्याच्या नाण्यांना असलेल्या मागणीत दिल्ली ४१ टक्के सर्चेससह आघाडीवर आहे आणि मुंबईत सोन्याच्या बार्सना ३४ टक्के मागणी आहे.
सोन्याच्या दागिन्यांना असलेल्या मागणीवर दुसऱ्या श्रेणीतील शहरांपैकी कोईम्बतूर आघाडीवर असून त्यानंतर चंदीगढ व लखनौचा क्रमांक लागतो. सोन्याच्या बार्सच्या बाबतीत जयपूर आघाडीवर असून त्यानंतर कोईम्बतूर व लखनौ आहे. सोन्याच्या नाण्यांना असलेल्या मागणीत दुसऱ्या श्रेणीतील शहरांपैकी जयपूर आघाडीवर असून त्यानंतर कोईम्बतूर आणि लखनौ अनुक्रमे दुसऱ्या व तिसऱ्या स्थानावर आहे.
चांदीच्या बाबतीत दागिन्यांना जास्त मागणी असून मागणीत त्यांचा २७ टक्के वाटा आहे. पहिल्या श्रेणीतील शहरांपैकी हैद्राबादमध्ये चांदीच्या दागिन्यांना जास्त मागणी आहे, तर बेंगळुरू व दिल्लीचा त्यानंतर क्रमांक लागतो. दिल्लीमध्ये चांदीची नाणी लोकप्रिय असून एकूण मागणीत त्यांचा ५० टक्के वाटा आहे. चांदीच्या सजावटीच्या वस्तूंच्या सर्चेसमध्ये बेंगळुरू आघाडीवर, त्यापाठोपाठ मुंबई आणि दिल्ली आहे.
दुसऱ्या श्रेणीतील शहरांमध्ये चांदीच्या दागिन्यांची मागणी ३८ टक्क्यांनी, सोन्याच्या नाण्यांची मागणी ४६ टक्क्यांनी आणि डिनर आयटम्सची मागणी ४१ टक्क्यांनी वाढली आहे. विजयवाडा, विशाखापट्टणम आणि राजकोटमध्ये चांदीच्या दागिन्यांना सर्वाधिक मागणी असून त्यांच्या लोकप्रियतेमध्ये वार्षिक पातळीवर ५९ टक्के वाढ झाली आहे. विजयवाडा आणि विशाखापट्टणम चांदीच्या डिनर सेट्समध्ये आघाडीवर आहे, तर लखनौ, उदयपूर व जयपूरमध्ये चांदीच्या नाण्यांना जास्त मागणी आहे.
पहिल्या श्रेणीतील शहरांपैकी मुंबई, दिल्ली आणि हैद्राबादमध्ये हिऱ्याच्या दागिन्यांना सर्वाधिक मागणी असून जयपूर, कोईम्बतूर व इंदौर दुसऱ्या श्रेणीतील शहरांमध्ये आघाडीवर आहे. प्लॅटिनम दागिन्यांच्या बाबतीत पहिल्या श्रेणीतील शहरांपैकी मुंबई, हैद्राबाद आणि बेंगळुरू आघाडीवर आहे, तर सुरत, कोईम्बतूर, जयपूर दुसऱ्या श्रेणीतील शहरांमध्ये आघाडीवर आहे.