पुणे- मुस्लिम आरक्षण परिषदेला पुणे पोलिसांनी काही अटींवर परवानगी दिली आहे. आज (बुधवार) पुण्यात होऊ घातलेल्या या आरक्षण परिषदेला एमआयएमचे खासदार असावुद्दीन ओवेसी हे हजर राहणार आहेत. आता गोळीबार मैदानावर नव्हे तर कोंढव्यातील कौसरबाग या बंदिस्त सभागृहात परिषद घेण्यात येणार आहे. तसेच यात आक्षेपार्ह वक्तव्य करता येणार नाहीत. कोणत्या समाजाबद्दल चिथावणीखोर भाषण करता येणार नाही, अशा स्वरुपाच्या अटी घालण्यात आल्या आहेत. पुणे पोलिसांनी समोर ठेवलेल्या या अटींच्या हमीपत्रावर असावुद्दीन ओवेसी यांनी सही केली आहे. ओवेसी हे धार्मिक व वादग्रस्त वक्तव्य करणारे असल्याने शिवसेनेचे पुणे शहरप्रमुख विनायक निम्हण यांनी ओवेसींच्या भाषणाला व सभेला विरोध केला होता. माजी न्यायमूर्ती बी. जी. कोळसे पाटील या परिषदेच्या अध्यक्षस्थानी राहणार आहेत.