मुंबई : मुख्यमंत्री देवेंद्र फडणवीस यांच्या जपान दौऱ्याला अतिशय उत्साहवर्धक प्रतिसाद मिळाला असून या दौऱ्याच्या माध्यमातून झालेल्या महाराष्ट्राच्या सकारात्मक प्रतिमानिर्मितीमुळे जपानमधील अनेक आघाडीच्या कंपन्यांनी राज्यात मोठी गुंतवणूक करण्याची तयारी दर्शविली आहे. त्यात दौऱ्याच्या अखेरच्या दिवशी मिझुहो बँकेशी झालेल्या एका महत्त्वपूर्ण करारामुळे अनेक जपानी कंपन्यांना गुंतवणुकीसाठी एक मोठे व्यासपीठ उपलब्ध झाले आहे.
मुख्यमंत्र्यांच्या उपस्थितीत आज एमआयडीसी आणि मिझुहो बँक यांच्यात भारतातील गुंतवणूक प्रक्रियेला गती देण्याच्या दृष्टीने एका सामंजस्य करारावर स्वाक्षरी करण्यात आली. या करारामुळे जपानी कंपन्यांना भारतात, विशेषत: महाराष्ट्रात गुंतवणूक करण्याच्या दृष्टीने मोठी चालना मिळणार आहे. मिझुहो ही जागतिक पातळीवरील आघाडीची वित्तीय संस्था असून असंख्य जपानी गुंतवणूकदार त्यांचे ग्राहक आहेत. जपानमध्ये नोंदणीकृत असलेल्या किमान ७० टक्के कंपन्या या मिझुहो बँकेशी जोडल्या गेल्या आहेत. ‘फॉर्च्युन १०००’ मधील सुमारे २५० वर कंपन्यांशी या बँकेचे व्यावसायिक सहकार्य आहे.
हे तिन्ही करार करण्यात फ्रेंडस ऑफ जपान असोसिएशनने अतिशय महत्त्वपूर्ण भूमिका वठविली आहे. फ्रेंडस ऑफ जपान असोसिएशनच्या वतीने आज एका विशेष कार्यक्रमाचे आयोजन करण्यात आले होते, त्या कार्यक्रमाला मुख्यमंत्री उपस्थित होते. महाराष्ट्रात अधिकाधिक गुंतवणूक यावी, या हेतूने समन्वयकाच्या भूमिकेतून काम करण्याची तयारी या असोसिएशनने दर्शविली आहे आणि तशा आशयाचे पत्रही एमआयडीसीला दिले आहे.
या कार्यक्रमानंतर मुख्यमंत्री आणि राज्याचे उद्योगमंत्री सुभाष देसाई यांनी आज जपानमधील योकोहामा बंदराला (पोर्ट) भेट दिली. या बंदराच्या माध्यमातून सुमारे २७ दशलक्ष टन इतकी मालवाहतूक केली जाते. योकोहामा पोर्टशी संबंधित अनेक मान्यवरांसोबत एक बैठकही यावेळी झाली आणि याठिकाणी होत असलेल्या विकास कामांचीही माहिती राज्याच्या शिष्टमंडळाने जाणून घेतली. योकोहामाच्या महापौर श्रीमती फुमिको हायाशी यांचीही मुख्यमंत्री आणि उद्योगमंत्री श्री. देसाई यांनी भेट घेतली.