पुणे : महावितरणच्या मंचर विभागातील पाच ग्रामपंचायतींमध्ये गुरुवारी (दि. 10) एकाच दिवशी वीजयंत्रणेची दुरुस्ती, नवीन वीजजोडण्या व वीजमीटर व देयकांसंबंधी 1172 कामे एकाच दिवशी पूर्ण करण्यात आली. उल्लेखनीय म्हणजे जुन्नर उपविभागातील केवाडी, उंडेखडक व कुसुर या गावात एकाच दिवशी 145 नवीन वीजजोडण्या देण्यात आल्या आहेत.
दरम्यान, राजगुरुनगर विभागातील टाकवे (वडगाव), कडूस (राजगुरुनगर) व कोयाळी (चाकण) या तीन ग्रामपंचायतींमध्ये 353 कामे पूर्ण करण्यात आली आहे. यात नवीन वीजजोडणीचे 51 एवन फॉर्म महावितरणला प्राप्त झाले आहेत. तसेच वीजयंत्रणेच्या दुरुस्तीचे 222 कामे व वीजदेयके व वीजमीटरसंदर्भात विविध तक्रारी निवारणाचे 80 कामे करण्यात आली आहेत.
मंचर विभागात गावडेवाडी (मंचर), गंगापूर व पिंपळगाव (घोडेगाव), खिरेश्वर (आळेफाटा), कुसुर (जुन्नर) व निमगाव सावा (नारायणगाव उपविभाग) या ग्रामपंचायतींमध्ये महावितरणकडून मागेल त्यांना वीजजोडणीमध्ये 176 वीजजोडण्या देण्यात आल्या. यात 167 घरगुती व 9 कृषीपंपांचा समावेश आहे. जुन्नर तालुक्यातील कुसुर, केवाडी, उंडेखडक या गावांत एकाच दिवशी 145 वीजजोडण्या देण्यात आल्या आहेत. यातील 90 पेक्षा अधिक वीजजोडण्या कार्यान्वित करण्यात आल्या असून उर्वरित जोडण्याचे काम पूर्णत्वाकडे आहे.
यासोबतच वीजदेयकांबाबत तक्रारी निवारण, सदोष व नादुरुस्त मीटर बदलणे, मीटरचे रिंडींग घेणे आदी प्रकारचे 472 कामे करण्यात आली तर वीजयंत्रणेमधील वाकलेले वीजखांब सरळ करणे, डिस्ट्रीब्यूशन बॉक्स व किटकॅट बदलणे, तारांमधील झोल काढणे, वीजखांबाला रंगकाम, स्पेसर्स बसविणे, वीजपुरवठ्याला अडथळे ठरणार्या झाडाच्या फांद्या तोडणे आदी प्रकारचे 472 कामे पूर्ण करण्यात आली. पुणे परिमंडलाचे मुख्य अभियंता श्री. रामराव मुंडे यांच्या मार्गदर्शनात पुणे ग्रामीण मंडलचे अधीक्षक अभियंता श्री. सुनील पावडे, मंचर विभागाचे कार्यकारी अभियंता श्री. प्रकाश खांडेकर, अतिरिक्त कार्यकारी अभियंता श्री. सोमनाथ मठपती, उपकार्यकारी अभियंता सर्वश्री रमेश कावळे, अविनाश चौगुले, संतोष तळपे, विवेक सुर्यवंशी, जयंत गेटमे यांच्यासह 24 अभियंते व 185 कर्मचारी सहभागी झाले होते.
