सुवर्णा पवार या महिला व बालविकास विभागामध्ये सहायक आयुक्त या पदावर कार्यरत आहेत. अत्यंत प्रतिकुल परिस्थितीत अधिकारी पदापर्यंत झेप घेतलेल्या या ग्रामीण महिलेने लहानपणी जवळच्या नातेवाईकांची भिक्षेकरी ही अवस्था जवळून पाहिली आणि भिक्षेकरी मुक्त महाराष्ट्र व्हावा याबाबत महाराष्ट्र शासनाच्या वतीने 15 ऑगस्ट 2017 ते 26 जानेवारी 18 या कालावधीत भिक्षेकरी मुक्त अभियान राबविले, अभियानाला प्रतिसाद मिळण्याकरिता राज्याच्या धर्मदाय आयुक्तांना विनंती करुन त्यांचा सहभाग मिळविला आहे. विविध ठिकाणी कार्यक्रमाद्वारे अपंग निराधार निराश्रीत व्यक्तीला लाचारीने भिक देऊ नका तर सन्मानाने जगण्यासाठी मदत करा, असे त्या सांगतात. रस्त्यावर व सार्वजनिक ठिकाणी भिक मागणाऱ्या व्यक्तीने लहान मुले असतील तर महिला व बालविकास विभागाची बालगृहे, महिला असतील तर महिलांसाठी असणारे आधारगृह, सरंक्षणगृह व भिक्षेकरी गृहापर्यंत पोहचवावे. वृध्द, अपंग, निराधार पुरुष असतील तर भिक्षेकरी गृहापर्यंत पोहचविण्यात यावे, असे त्या आवाहन करतात. नुकतेच दुरदर्शनवर सखी सहयाद्री या कार्यक्रमातून त्यांनी जनतेला आवाहन केले आहे.
सामाजिक बांधिलकी जपणारी ही महिला अधिकारी राजपत्रित महासंघाची महिला संघटन सचिव असून त्या अंतर्गत चालविलेल्या पुणे जिल्हा दुर्गामंचाची अध्यक्षा आहे. ऑफीसर फोरम या अधिकारी संघटनेची पुणे जिल्हा अध्यक्ष असून लेखिका, कवयित्री आहे. त्यांची पाच पुस्तके प्रकाशित झाली असून त्यात एका कविता संग्रहाचा समावेश आहे. अधिकारी पदावर असूनही दुर्बल घटकासाठी हिरीरीने पुढे येणाऱ्या या महिला अधिकाऱ्याचे कार्य कौतुकास्पद आहे.