पुणे – राजकुमार हिरानी दिग्दर्शित पीके हा हिंदी चित्रपट १९ डिसेंबर यादिवशी प्रदर्शित झाला. त्यामध्ये हिंदूंच्या देवता, साधू-संत, मंदिरे, पूजाविधी यांची बदनामी करण्यात आली आहे. त्यामुळे हिंदूंमध्ये प्रचंड संतापाची लाट उसळली आहे. हिंदूंच्या धर्मभावनांची दखल घ्यावी, असा आरोप करीत डेक्कन येथील गुडलक चौकात पीके चित्रपटाच्या विरोधात आंदोलन करण्यात आले.
या वेळी पीके चित्रपटावर त्वरित बंदी आणण्यात यावी, तसेच हिंदूंचा तीव्र विरोध असतांनाही त्याला कानाडोळा करून चित्रपटातील आक्षेपार्ह दृश्ये न काढण्याची भूमिका घेणारे चित्रपट परिनिरीक्षण मंडळ त्वरित बरखास्त करून त्याची पुनर्रचना करण्यात यावी, अशी आग्रही मागणी करण्यात आली. हिंदू स्वाभिमान प्रतिष्ठान, सनातन संस्था, हिंदू जनजागृती समिती आदी संघटना या आंदोलनात सहभागी झाल्या होत्या. हिंदू स्वाभिमान प्रतिष्ठानचे सचिव अधिवक्ता देवदास शिंदे, सनातन संस्थेच्या राजश्री खोल्लम, हिंदू जनजागृती समितीचे पराग गोखले आदी उपस्थित होते.