पुणे:
“शहरात डेंग्युला अटकाव घालण्यासाठी पालिका करीत असलेल्या उपाय योजनांतील सर्वेक्षण कार्यात राज्य शासनाच्या आरोग्य विभागाच्या आणि “बीव्हीजी इंडिया लिमिटेड’ या सेवा क्षेत्रातील कंपनीच्या माध्यमातून चालविण्यात येणाऱ्या “महाराष्ट्र मेडिकल इमर्जन्सी सर्व्हिसेस’च्या डॉक्टरांनी दिलेले योगदान कौतुकास्पद आहे. ही सर्वेक्षण मोहिम झोपडपट्टी भागातील दीड लाख नागरिकांपर्यंत पोहोचली’, असे उद्गार भारतीय जनता पक्षाचे आमदार विजय काळे यांनी डॉक्टर सेवक- सुहृदांसांठी कृतज्ञता समारंभात काढले.
हा कृतज्ञता कार्यक्रम सोमवार दिनांक, 24 नोव्हेंबर रोजी सकाळी 11.30 वाजता “वडके सभागृह’ (पुणे महानगरपालिका) येथे झाला. डॉ. संजय वावरे (सहाय्यक आरोग्य अधिकारी, पुणे महानगरपालिका) बोलताना म्हणाले, ” साथीच्या रोगावर नियंत्रण मोहिमेचे आयोजन करणारी पुणे महानगरपालिका एकमेव पालिका ठरली आहे.’
यावेळी कर्मचारी, डॉक्टर, अधिकाऱ्यांचा गौरव करण्यात आला. “एमईएमएस’ चे चीफ ऑपरेटिंग ऑफिसर डॉ. ज्ञानेश्वर शेळके यांनी यावेळी “डायल 108′ या अत्याधुनिक वैद्यकीय सेवेबद्दल माहिती दिली. एमईएमएस चे डॉ. प्रविण साधले, डॉ. प्रविण कोतवाल यांनी या मोहिमेच्या आयोजनात मदत केली.
पुण्यातील इंदिरा वसाहत, कस्तुरबा, बोपोडी (औंध), शंकर महाराज वसाहत, के.के मार्केट इंदिरानगर, आंबेडकरनगर (बिबवेवाडी), भवानी पेठ, कासेवाडी भवानी पेठ अशोक नगर, रामनगर (वारजे), जनवाडी, गोखलेनगर, पांडवनगर, वडारवाडी, संगमवाडी, विश्रांतवाडी (घोले रोड), वैधुवाडी कृष्णानगर, माळवाडी (हडपसर), यमुनानगर, विमाननगर, गांधीनगर, नागपूर चाळ (नगर रोड), लोअर इंदिरानगर धनकवडी, मार्केटयार्ड, भीमनगर, सिदार्थनगर-निंब, (कोंढवा), शिवाजीनगर, डीपी रोड, गुलटेकडी, ढोले-पाटील रोड या भागामध्ये पालिकेची डेंग्यु अटकाव मोहिम सुरू आहे.
पालिकेच्या या मोहिमेतील सर्वेक्षण कार्यात “महाराष्ट्र मेडिकल इमर्जन्सी सर्व्हिसेस’ चे 42 डॉक्टर्स व कर्मचारी सहभागी आहेत. गणपती विसर्जन अणि डेंग्यू सर्वेक्षणाच्या मदतकार्यात सहभागी झालेले डॉक्टर्स, पायलट, सहाय्यक, अधिकारी यांचा कृतज्ञता सन्मान करण्यात आला. एमईएमएस चे डॉ.साकेत टीळेकर यांनी कार्यक्रमांचे सूत्रसंचालन केले.
“26 जानेवारी 2014 रोजी सुरू झालेल्या या अत्याधुनिक वैद्यकीय सेवेसाठी 108 या दूरध्वनी क्रमांकावर डायल केल्यास सुसज्ज रुग्णवाहिका डॉक्टरांसह येते. 108 डायल वातानुकुलित विनामूल्य सेवा रूग्णवाहिकांमध्ये प्राण वाचविण्यासाठी व्हेंटीलेटरसहित सर्व अत्याधुनिक वैद्यकीय साधने आहेत. या सेवेचे मुख्य संचालन केंद्र व “रिस्पॉन्स सेंटर’ औंध उरो रुग्णालय (पुणे) येथे आहे, असे “बी.व्ही.जी. इंडिया’चे अध्यक्ष एच.आर. गायकवाड यांनी सांगितले.