पुणे :- कृषी, उद्योग, पर्यावरण व कल्पकता आदी क्षेत्रात उल्लेखनीय कार्य करणाऱ्या
महिलांना ज्योती कुलकर्णी रिसर्च फाउंडेशनतर्फे सन्मानित करण्यात येणार आहे. या
सोहळ्यासाठी प्रमुख पाहुण्या म्हणून वीणा देव, सिंधुताई सपकाळ यांची सन्मानीय उपस्थिती
आणि डॉ. जयश्री तोडकर यांची विशेष उपस्थिती लाभणार असून येत्या २७ तारखेला सांयकाळी
६ वाजता म्हात्रे पुलाजवळील,घरकुल लॉन्स येथे हा सोहळा आयोजित करण्यात आला आहे.
अशी माहिती फाउंडेशनच्या विश्वस्त सौ. अश्विनी देशपांडे यांनी आज झालेल्या पत्रकार
परिषदेत दिली. यावेळी सौ. भाग्यश्री कुलकर्णी, सौ. तन्वी कुलकर्णी, श्रमिका धोमकर व गीता
भुर्के उपस्थित होत्या.
कार्यक्रमाविषयी अधिक माहिती देताना देशपांडे यांनी सांगितले कि, डी. एस कुलकर्णी यांच्या
ज्येष्ठ पत्नी स्व. ज्योती कुलकर्णी यांच्या जन्मदिनाचे औचित्य साधून आम्ही या कार्यक्रमाचे
आयोजन केले आहे. खडतर वाटचालीतून परिस्थितीशी लढत शेतामध्ये नाविन्याचे मळे
फुलवणाऱ्या महिलांना ज्योती कृषीकन्या हा पुरस्कार देण्यात येणार आहे.नंदा काळभोर यांना
यंदाच्या वर्षी या या पुरस्काराने सन्मानित करण्यात येणार आहे.५१ हजार रोख व मानपत्र हे
या पुरस्काराचे स्वरूप असेल. उद्योग क्षेत्रात असामान्य कार्य करणाऱ्या सुहासिनी वैद्य,
सायली मुतालिक, स्वाती ओतारी आणि आदर्श महिला बचत गट यांना ज्योती उद्योगिनी हा
पुरस्कार देऊन गौरविण्यात येणार असून २५ हजार व मानपत्र हे या पुरस्कारचे स्वरूप असेल.
निसर्गाची कस धरून पर्यावरण क्षेत्रात विशेष कार्य करणाऱ्या अपर्णा वाटवे यांना ज्योती
निसर्गप्रिया पुरस्कार प्रदान करण्यात येणार असून ११ हजार रुपये हे पुरस्काराचे स्वरूप
असेल.स्त्रियांच्या कल्पकतेला वाव मिळण्यासाठी नुकत्याच घेण्यात आलेल्या पुष्परचना
स्पर्धेतील विजेत्यांनाही यावेळी ज्योती फुलराणी या पुरस्कारानेसन्मानित करण्यात येणार
असल्याचे त्यांनी सांगितले
स्व. ज्योती कुलकर्णी यांनी आपल्या अष्टपैलू व्यक्तीमत्वाने स्त्री अबला नाही हे दाखवून
दिले. डीएसके समूहाच्या पायाभरणीत तसेच यशस्वी वाटचालीत त्यांचा सिंहाचा वाट आहे.
पारंपारिक व आधुनिकतेची योग्य सांगड घालून यश कसे संपादन कसे करता येईल याची
त्यांना उत्तम जाण होती. त्याचबरोबर सामाजिक कार्यातही त्यांना विशेष रस होता. त्यांच्या
या व्यक्तीमत्वाचा खर्या अर्थाने सन्मान व्हावा, या हेतूने आम्ही या पुरस्कार सोहळ्याचे
आयोजन केल्याची भावना सौ. तन्वी कुलकर्णी यांनी व्यक्त केली.
ज्योती कुलकर्णी रिसर्च फाउंडेशनची थोडक्यात माहिती भाग्यश्री कुलकर्णी यांनी दिली. त्या
म्हणाल्या की, स्त्रियांनी स्त्रियांसाठी चालवलेली संघटना म्हणजे ज्योती कुलकर्णी रिसर्च
फाउंडेशन . आज आपल्यात अशा असंख्य स्त्रिया आहेत ज्या आपल्या कार्याने इतरांना आधार
देत आहेत. अशा स्त्रियांना प्रोत्साहन मिळावे, त्यांच्या हातांना बळ मिळावे, त्यांच्यामध्ये लढावू
वृत्ती निर्माण व्हावी या उद्देशाने ह्या फौंडेशनची स्थापना केली आहे.कष्ट करणाऱ्या स्त्रियांच्या
पाठीशी उभी राहणारी संघटना अशी ज्योती कुलकर्णी रिसर्च फाउंडेशनची ओळख निर्माण
व्हावी, असा आमचा मानस असल्याचे त्यांनी स्पष्ट केले.