सायबर क्राइम सारख्या ज्वलंत विषयावर भाष्य – ‘शॉर्टकट’!!

सध्याची युवापिढी ही इंटरनेट, सोशल मिडिया, मोबाईल फोन आणि विविध अॅप्लिकेशन्सच्या कचाट्यात पूर्णतः गुंतत जात असल्याचे चित्र आपल्या सर्वत्र पहायला मिळत आहे. एका बाजूला विज्ञानाची होणारी जलद गतीची प्रगती आपल्याला उपयुक्त जरी ठरत असली तरी दुसऱ्या बाजूला ह्या प्रगतीचा गैरवापरदेखील जगात  मोठ्या प्रमाणात होत आहे. यामुळेच सायबर क्राइमसारख्या गुन्ह्यांमध्ये मोठ्या प्रमाणात दिवसेंदिवस कमालीची वाढ होत आहे. झटपट श्रीमंत होण्याच्या हव्यासापोटी हल्लीची युवापिढी पैसा, प्रसिद्ध मिळवण्यासाठी ‘शॉर्टकट’ चा मार्ग अवलंबायला जराही मागे पुढे पाहात नाही, पण हाच ‘शॉर्टकट’ कधीतरी वेगळं वळण घेउन आपल्याला घातक ठरू शकतो याचा जराही विचार या तरुण मंडळीना नसतो.”सायबर क्राइम” सारखा अत्यंत ज्वलंत विषय ‘शॉर्टकट’ दिसतो पण नसतो, या आगामी सिनेमातून अतिशय उत्तम पद्धतीने मांडण्यात आला आहे.‘एम के मोशन पिक्चर्स’चे मुकेश चौधरी आणि चित्रकार फिल्म्सचे बी. आर. देढीया यांची निर्मिती असलेल्या ‘शॉर्टकट’ सिनेमाचे दिग्दर्शन हरीश राऊत यांनी केले असून त्यांचा हा पहिलाच मराठी सिनेमा आहे.
“शॉर्टकट” सिनेमात अभिनेते राजेश शृंगारपुरे, वैभव तत्ववादी, नरेश बिडकर आणि अभिनेत्री संस्कृती बालगुडे या त्रिकुटाचा उत्तम अभिनय आपल्याला पहायला मिळणार आहे. सिनेमाची कथा हरीश राऊत यांची असून पटकथा हरीश राऊत, विनय नारायणे आणि राजेश बाळापुरे यांची आहे, तर संवाद विनय नारायणे यांचे आहेत.शकील खान यांनी सिनेमॅटोग्राफर म्हणून काम पाहिले असून या सिनेमात रॉक संगीतासोबतच रोमॅंटिक संगीताची मेजवानी आपल्याला मिळणार आहे. या सिनेमात एकूण सहा गाणी असून चार गाणी मराठीत तर दोन गाणी हिंदीत स्वरबद्ध करण्यात आली आहेत
संगीतकार निलेश मोहरीर, सुशांत-शंकर, प्रेमानंद, पुनीत दीक्षित, चाँद साध्वानी आणि निक अशा संगीतकारांचे संगीत या सिनेमाला लाभले असून सिनेमातील गाणी गायक स्वप्नील बांदोडकर, कौशिक देशपांडे, मोहोमद इरफान, निक, अभिषेक, अमित मिश्रा, असित त्रिपाठी, गायिका सावनी रविंद्र, आनंदी जोशी आणि राही यांच्या सुमधुर आवाजात रेकॉर्ड करण्यात आली आहेत.
आजवर अनेक नावाजलेल्या मराठी आणि हिंदी सिनेमांसाठी प्रमोटर म्हणून काम पाहणाऱ्या GSEAMS कंपनीचे अर्जुन सिंग बारन आणि कार्तिक निशाणदार हे या सिनेमासाठीदेखील प्रमोटर म्हणून काम पाहत आहे.
तर असा हा रोमॅंटिक आणि थ्रिलरचे अनोखे कॉम्बिनेशन असलेला ‘शॉर्टकट’ दिसतो पण नसतो, सिनेमा ७ ऑगस्टपासून संपूर्ण महाराष्ट्रात प्रदर्शित होत आहे.