‘स्त्रियांमधील हार्मोनविकार’ विषयावरील कार्यशाळेत तज्ज्ञांचा सूर
‘दीनानाथ मंगेशकर हॉस्पिटल’च्या ‘एन्डोक्रायनॉलॉजी विभागा’च्या वतीने
आयोजित जागरूकता कार्यशाळेत 245 महिला डॉक्टरांचा सहभाग
पुणे:
महिलांमधील हार्मोनविकार या विषयावर महिला डॉक्टरांमध्ये जागृती निर्माण करण्यासाठी ‘दीनानाथ मंगेशकर सुपरस्पेशालिटी हॉस्पिटल’च्या‘एन्डोक्रायनोलॉजी विभागा’तर्फे एकदिवसीय कार्यशाळेचे आयोजन आज रविवार, दि. 8 मार्च 2015 या महिलादिनी सकाळी 9 ते सायंकाळी 5 वाजेपर्यंत करण्यात आले होते. या कार्यशाळेत पुणे व परिसरातील 245 महिला डॉक्टर सहभागी झाल्या होत्या.
‘दीनानाथ मंगेशकर रूग्णालयातील सौद बहावान सभागृहामध्ये (आठवा मजला, मेन बिल्डींग) या एक दिवसीय कार्यशाळेचे उद्घाटन दीनानाथ मंगेशकर रूग्णालयाचे विश्‍वस्त आणि वैद्यकीय संचालक डॉ. धनंजय केळकर यांच्या हस्ते झाले.
उद्घाटनानंतर डॉ.धनंजय केळकर म्हणाले, ‘महिलांमधील हार्मोनविकार हा अतिशय काळजीचा विषय आहे. भारतातील महिला या स्वत:च्या आरोग्याला फक्त 5 टक्के महत्व देतात. त्यामुळे ताणाचे प्रमाण महिलांमध्ये जास्त आहे. महिलांनी ताण व्यवस्थापन, सकारात्मक विचार, आहार, वजन आणि व्यायाम याकडे दुर्लक्ष करु नये. महिला या कुटुंबातील मध्यवर्ती भाग असतात. नकारात्मकता सोडून सकारात्मक विचार महिलांचे आणि त्याबरोबरच कुटुंबाच्या जीवनात बदल घडवू शकतात.’
महिला रूग्णांना व महिला डॉक्टरांना मधुमेह, थायरॉइड, स्थुलपणा, पॉलिसिस्टीक ओव्हरीज, ऑस्टिओपोरॅसिस यांसारख्या हार्मोनविकारांची माहिती मिळण्यासाठी तसचे या आजारांविषयी अनेक प्रश्‍न डॉक्टर व रूग्णांमध्ये असतात त्यावर मार्गदर्शन करण्यासाठी ही कार्यशाळा उपयुक्त ठरणार आहे. महिलांमधील हार्मोनविकार या विषयावरील कार्यशाळा प्रथमच पुण्यात होत आहे.
महिलादिनाचे औचित्य साधून, डॉक्टर स्त्रियांचे प्रबोधन एक स्त्री व एक डॉक्टर म्हणून होणे गरजेचे आहे. त्याकरीता ही कार्यशाळा फक्त महिला डॉक्टरांसाठी आयोजित करण्यात आली आहे, अशी माहिती डॉ. वैशाली देशमुख (एन्डोक्रायनोलॉजी विभाग प्रमुख) यांनी या कार्यशाळेच्या प्रास्ताविकात दिली.
डॉ. वैशाली देशमुख, डॉ. धनंजय केळकर, डॉ. अरूंधती खरे, डॉ. रमा वैद्य, डॉ.वगीश अय्यर, डॉ. प्रेमा वर्तकवी, डॉ. अनीश बहल, डॉ. अमेया जोशी, डॉ. नितीन पाटणकर, डॉ. गीता धर्माती, डॉ.चेतन देशमुख, डॉ.धनश्री भिडे, डॉ. संजय फडके या तज्ज्ञांनी महिला डॉक्टरांसाठी ‘स्त्रीयांमधील हार्मोनविकार’ यासंबंधी प्रशिक्षण व जागरूकता याविषयीच्या कार्यशाळेत मार्गदर्शन केले. डॉ. राजन जोशी आणि डॉ. चारुलता बापये, डॉ. शशीकला सांगळे, डॉ. गिरीश बापट, डॉ. अनघा पैरायतूरकर, डॉ. संदीप ताम्हणे, डॉ. विनय कुलकर्णी यांनी कार्यशाळेतील विविध सत्रांचे सूत्रसंचालन केले.
मधुमेह, थायरॉइड, स्थुलपणा, पॉलिसिस्टीक ओव्हरीज, ऑस्टिओपोरॅसिस, स्त्रियांमध्ये वेगवेगळ्या वयोगटात होणारे थायरॉइडचे प्रकार,आहार, वजन यांसारख्या अनेक हार्मोनविषयक आजारांवर तज्ज्ञ महिला डॉक्टरांनी या कार्यशाळेत मार्गदर्शन केले. उपस्थित महिला डॉक्टरांनी प्रश्‍न उत्तरांच्या सत्रांमध्ये आपल्या शंकां विचारुन मार्गदर्शन घेतले.
