पुण्यात कॅंटोन्मेंट मध्ये भाजप, तर खडकीत कॉंग्रेस ला बहुमत —राष्ट्रवादी, शिवसेनेचा सफाया

पुणे – पुणे कॅंटोन्मेंट बोर्डाच्या निवडणुकीत भारतीय जनता पक्षाने पाच जागा मिळवून कॉंग्रेसच्या बालेकिल्ल्याला खिंडार पाडले, तर खडकीत पाच जागा जिंकलेल्या कॉंग्रेसने आपला गड राखला. पुण्यात कॉंग्रेसला दोन, तर एका जागेवर अपक्ष उमेदवार विजयी झाला. खडकीत एक भाजप, तर दोन जागा अपक्षांच्या पदरात पडल्या. दोन्ही बोर्डांत राष्ट्रवादी आणि शिवसेना यांना मानहानीकारक पराभवाला सामोरे जावे लागले.
पुणे कॅंटोन्मेंट बोर्डाच्या वॉर्ड क्रमांक एकमधून विद्यमान सदस्य शैलेश बिडकर यांच्या पत्नी रूपाली या अपक्ष म्हणून विजयी झाल्या. त्यांनी भाजपच्या अनिता सोनटक्के यांचा पराभव केला. वॉर्ड दोनमधील लढतीत कॉंग्रेसचे अशोक पवार यांनी बाजी मारली. त्यांनी अपक्ष मेहेर इराणी यांचा पराभव केला, तर तीनमधून भाजपचे दिलीप गिरमकर यांनी अपक्ष प्रसाद केदारी यांचा पराभव केला. चारमध्ये भाजपचे अतुल गायकवाड यांनी कॉंग्रेसच्या करण मकवानी यांना धूळ चारली. पाचमध्ये भाजपचे विवेक यादव यांनी बोर्डाच्या माजी उपाध्यक्ष व कॉंग्रेसच्या आरती महाजन यांच्यावर विजय मिळविला. सहामधून कॉंग्रेसचे विनोद मथुरावाला यांनी भाजपच्या सचिन मथुरावाला यांचा पराभव केला. सातमध्ये भाजपच्या डॉ. किरण मंत्री यांनी कॉंग्रेसच्या सुरेखा कवडे यांचा पराभव केला, तर आठमध्ये भाजपच्या प्रियांका श्रीगिरी यांनी कॉंग्रेसच्या साबीरा शेख यांच्यावर विजय मिळविला.
खडकीतील वॉर्ड एकमधून कॉंग्रेसच्या सुरेश कांबळे यांनी राष्ट्रवादीच्या विशाल गायकवाड यांचा पराभव केला. वॉर्ड दोनमध्ये कॉंग्रेसच्याच कमलेश चासकर यांनी भाजपच्या अनिल मेहता यांना धूळ चारली. तीनमध्ये मनीष आनंद यांनी राष्ट्रवादी कॉंग्रेसच्या ज्ञानेश्‍वर यादव व भाजपच्या संगीता गवळी यांचा पराभव केला, तर आनंद यांच्या पत्नी पूजा आनंद यांनी वॉर्ड चारमध्ये भाजपच्या किरण त्यागी यांना पराभवाची धूळ चारली. अतिशय अटीतटीच्या लढतीत भाजपच्या कार्तिकी हिवरकर यांनी वॉर्ड पाचमध्ये संतोषी वेणुगोपाल यांच्यावर अवघ्या 14 मतांनी विजय मिळविला. सहामध्ये अनपेक्षितरीत्या अपक्ष उमेदवार वैशाली पहिलवान यांनी कॉंग्रेसच्या काश्‍मिरा हिवाळे यांचा पराभव केला. सातमध्ये अपक्ष व कॉंग्रेसचे बंडखोर उमेदवार दुर्योधन भापकर यांनी कॉंग्रेसच्या अंजुम मणियार यांच्यावर विजय मिळविला, तर आठमध्ये कॉंग्रेसच्या अभय सावंत यांनी माजी नगरसेविका वंदना बालगुडे यांना हरविले.