आजच्या युगात स्त्रिया पुरुषांपेक्षा कांकणभर श्रेष्ठ ठरत असताना काही पातळ्यांवर मात्र आजही त्यांचे शोषण होतच आहे. विशेषत: आजची पिढी जरी करिअरस्टिक असली तरी चंगळवादाच्या कृष्णविवरात अडकत चालली आहे. एकीकडे मन लावून अभ्यास करत स्वत:चे करिअर घडवायचे आणि दुसरीकडे पाश्चात्त्य संस्कृतीच्या आहारी जाऊन स्वत:ला अशा चक्रव्यूहात ढकलून द्यायचे, जिथे केवळ मन:स्ताप आणि पश्चाताप आहे. ‘चित्रफित ३.० मेगापिक्सल’ या सिनेमाचं कथानक या गोष्टींवरच आधारित आहे. ‘चित्रफित ३.० मेगापिक्सल’चा विषय जरी बोल्ड आणि सेंसेशनल असला तरी लेखकाच्या रूपात संवादलेखन करताना दिवाकर घोडके यांनी या सिनेमाची नाळ तरुणाईशी जोडली आहे. त्यामुळेच तरुणाईच्या भाषेतील एक स्टायलिश सिनेमा तयार झाला आहे.
राहुल बोरसे, अब्दुल आर. सी. ‘चित्रफित ३.० मेगापिक्सल’चे निर्माते असून सोमनाथ देवकर आणि जीवन पाटील सहनिर्माते आहेत. अभिनेता आशिष पाथोडे या सिनेमात मुख्य भूमिकेत दिसणार असून त्याच्यासोबत सीमा आझमी, रवी पटवर्धन, गौरी शंकर, शेफाली मायदेव, दानसिंग राजपूत, माईक हेवन, नेरव सोनी, विनिता, महेश राळे, ईशा, सचिन कबीर, विपुल पाटील, मीनल चिरणकर, कोमल आणि सुहास शिरसाठ आदी कलाकारांच्या या सिनेमात भूमिका आहेत.
आशयघन कथानकाला प्रगत तंत्रज्ञानाची जोड देऊन बनवण्यात आलेला ‘चित्रफित ३.० मेगापिक्सल’ हा धडाकेबाज सिनेमा २० फेब्रुवारी २०१५ रोजी प्रदर्शित होणार आहे. भंडारदरा, माळशेज घाट, लोणावळा सह्याद्रीच्या विस्तीर्ण पर्वतरांगा, खिरोडा तसेच मुंबई आसपासच्या नयनरम्य परिसरात या सिनेमाचे चित्रीकरण करण्यात आले आहे. त्यामुळे निसर्गाच्या विविध रंगांसोबत मानवी स्वभावाच्या बदलत जाणा-या रंगछटाही बारकाईने या सिनेमात पाहायला मिळणार आहेत. सचिन कबीर आणि मयूर हरदास या सिनेमाचे कॅमेरामन आहेत. प्रसाद कुलकर्णी आणि युग भुसाळ यांनी लिहिलेल्या गीतांना गायक आदर्श शिंदे, विजय प्रकाश, नंदेश उमप, नागेश आडगावकर यांनी स्वर दिला आहे. तर संगीतकार युग भुसाळ यांनी संगीत दिले आहे. कला-दिग्दर्शन दिनेश लहाते, ध्वनी दीप सिंग आणि शंकर सिंग पार्श्वसंगीत रोहित कुलकर्णी व्हिज्यूअल इफेक्ट्स अब्दुल रेहमान कोटवाला यांनी सिनेमाच्या तांत्रिक बाजू भक्कम केल्या आहेत.
