पुणे-न्यायालयाचे कामकाज सुरू असताना महिला वकिलांनी केस व्यवस्थित करू नये, अशी नोटीस पुणे जिल्हा न्यायालयाकडून काढण्यात आली होती. या नोटीसनंतर अनेकांनी टीका केली. त्यामुळे अखेर ही नोटीस मागे घेण्यात आली आहे.दरम्यान, नोटीस मागे घेतली असली तरी याची चर्चा आता सुरू झाली आहे.वरिष्ठ वकील इंदिरा जयसिंग यांनी शनिवारी ट्विटरवरून या नोटीसचा फोटो शेअर केला होता. तसेच त्यांनी म्हटलं होते की, “व्वा, पाहा आता, महिला वकिलांकडून कोण आणि का विचलित होत आहे.” नोटीस मागे घेतली गेली असल्याचंही इंदिरा जयसिंग यांनी ट्विटरवर सांगितले आहे.
नोटीमध्ये लिहिण्यात आले होते की, न्यायालयात हे सातत्याने निदर्शनास आले आहे की महिला वकील या अनेकदा न्यायालयातच आपले केस व्यवस्थित करत असतात. हे कृत्य न्यायालयाच्या कामकाजात हे अडथळा आणणारे किंवा विचलित करणारे आहे. त्यामुळे महिली वकिलांनी अशी कृत्ये करू नयेत. ही नोटीस बोर्डावरही लावण्यात आली होती. पुणे जिल्हा न्यायालयाच्या नोटीसीचा फोटो व्हायरल होत असून त्यात २० ऑक्टोबर रोजी ही नोटीस देण्यात आल्याचे दिसते.
दरम्यान, ही नोटीस व्हायरल झाल्यानंतर चहुबाजूंनी जोरदार टीका झाली आणि नोटीस मागे घ्यावी लागली. मात्र सूत्रांनी सांगितले की, न्यायालयीन कामकाजाचा डेकोरम राखणे इतकाच या नोटीसीचा हेतू होता. भावना दुखावण्याचा कोणताही हेतू नव्हता असं न्यायालयाने सांगण्यात आले.