पुणे९: राजपत्रित अधिकारी महासंघ अंतर्गत दुर्गा महिला मंच च्या वतीने महिला अधिकाऱ्यांसाठी दि.13 जुलै 2018 रोजी दुपारी 2.30 वाजता एस.सी.ई.आर.टी., पुणे येथे राज्यस्तरीय बैठकीचे आयोजन करण्यात आले आहे.
राज्यातील सर्व महिला अधिकाऱ्यांनी अधिकाधिक संख्येने या बैठकीस उपस्थित राहावे,असे आवाहन महाराष्ट्र राज्य राजपत्रित अधिकारी महासंघाचे संस्थापक व मुख्य सल्लागार ग.दि. कुलथे, राज्य उपाध्यक्ष तथा संघाचे जिल्हा अध्यक्ष विनायक लहाडे, दुर्गा महिला मंचच्या राज्य अध्यक्ष डॉ. सोनाली कदम, उपाध्यक्ष सितल सेवतकर, राज्य सह सचिव सविता नलावडे, समीक्षा चंद्राकार, राज्य संघटक तथा दुर्गा मंच, पुणेच्या सुवर्णा पवार, मोनिका सिंग, सचिव वृषाली पाटील यांनी केले आहे.
ज्या जिल्ह्यात दुर्गामंच स्थापन झाला नाही त्या जिल्ह्यातील जिल्हा समन्वय समितीच्या महिला सदस्यांनी बैठकीस उपस्थित राहणे आवश्यक आहे. दुर्गामंच सदस्य, तसेच समन्वय सदस्यांशिवाय इतर इच्छुक महिला अधिकारीही बैठकीस उपस्थित राहू शकतात. या बैठकीत महिला अधिकारी यांना शासकीय नोकरी करताना येणाऱ्या विविध अडचणींवर चर्चा होणार असून त्या सोडवण्यासाठीच्या निश्चित धोरणाबाबत शासनाला सादर करावयाचे निवेदन तयार करण्यात येईल. बैठकीत महिलांच्या सेवेसंबंधीच्या समस्या व त्यावरील उपायांबाबत धोरण आखण्याबरोबरच दुर्गा महिला मंच चे उद्दीष्ट ठरवण्यात येईल. सर्व कार्यालयात महिलांसाठी स्वच्छ स्वच्छता गृहाची स्थापना, कामाच्या ठिकाणी महिलांच्या होणाऱ्या लैंगिक छळाबाबत कडक कार्यवाही, शासकीय कार्यालय परिसरात पाळणाघरांची स्थापना आदी बाबींवर बैठकीत चर्चा होईल.. यासाठी जास्तीत जास्त महिला अधिकारी उपस्थित रहावे. महिला अधिकाऱ्यांच्या समस्या व त्यावरील उपाययोजनांबाबतच्या टिपणीसह उपस्थित रहावे,असे आवाहन दुर्गा मंचच्या वतीने करण्यात आले आहे..
