न्यू इंग्लिश स्कूलमध्ये मिळणार विद्यार्थिनींना प्रवेश
पुणे- राम गणेश गडकरी, केशवसूत, बाळासाहेब खेर, ना. ग. गोरे, एस. एम. जोशी, गोपीनाथ तळवलकर, राम कोरटकर असे प्रतिभावंत विद्यार्थी घडविणार्या टिळक रस्त्यावरील ऐतिहासिक न्यू इंग्लिश स्कूलमध्ये या शैक्षणिक वर्षापासून विद्यार्थिनींना प्रवेश देऊन सहशिक्षण सुरू करण्याचा निर्णय डेक्कन एज्युकेशन सोसायटीच्या व्यवस्थापनाने घेतला आहे.
आजपासून (३ मे) इयत्ता पाचवीच्या वर्गांसाठी विद्यार्थ्यांबरोबर विद्यार्थिनींना प्रवेश अर्ज उपलब्ध होणार आहेत. मुख्याध्यापक नागेश मोने यांनी ही माहिती प्रसिध्दीपत्रकाद्वारे कळविली आहे.
लोकमान्य बाळ गंगाधर टिळक, समाजसुधारक गोपाळ गणेश आगरकर, विष्णूशास्त्री चिपळूणकर, महादेव बल्लाळ नामजोशी या धुरिणांनी एकत्र येऊन राष्ट्रीय शिक्षण देण्यासाठी १८८० मध्ये नाना वाड्यात न्यू इंग्लिश स्कूलची स्थापना केली.
त्याकाळी शासकीय संस्था आणि ख्रिश्चन मिशिनर्यांमधून शिक्षण दिले जात होते. त्यामुळे न्यू इंग्लिश स्कूलची स्थापना ही क्रांतीकारी घटना ठरली. किफायतशीर शुल्क आकारुन दर्जेदार राष्ट्रीय शिक्षण सुलभतेने उपलब्ध व्हावे हा स्थापनेमागचा मुख्य उद्देश होता. त्यानंतर २४ ऑक्टोबर १८८४ रोजी स्थापन झालेल्या डेक्कन एज्युकेशन सोसायटीच्या व्यवस्थापनाखाली न्यू इंग्लिश स्कूलचे कामकाज सुरू झाले.
विष्णूशास्त्री चिपळूणकर, डॉ. धोंडो केशव कर्वे, डॉ. द. न. गोखले, मो. रा. वाळंबे, पु. ना. विरकर आदी मान्यवरांनी शाळेचे मुख्याध्यापक म्हणून काम पाहिले. १९५४ मध्ये शाळा टिळक रस्त्यावरील इमारतीत स्थलांतरीत करण्यात आली. या वास्तूला पुरातत्व खात्याने हेरिटेज दर्जा दिला आहे.
१९३६ पर्यंत शाळेत विद्यार्थिनींना प्रवेश दिल्याच्या नोंदी जुन्या कागदपत्रांमध्ये आढळतात. आता या शैक्षणिक वर्षापासून विद्यार्थिनींना प्रवेश देण्याचा निर्णय घेण्यात आला आहे. सहशिक्षण ही काळाची गरज आहे. बदलत्या सामाजिक परिस्थितीचा विचार केल्यास महिलांबद्दलचा आदर वाढण्यासाठी सहशिक्षण आवश्यक आहे. गुणवत्ता, अनुशासन, कार्यक्षमता यांचा विचार करून विद्यार्थिनींना प्रवेश देण्याचा निर्णय घेतल्याची माहिती सोसायटीच्या नियामक मंडळ व परिषदेचे अध्यक्ष डॉ. शरद कुंटे यांनी दिली.
तारांगण, वेधशाळा, भूगर्भशास्त्र संग्रहालय, सर्जन मंचाद्वारे चित्रकला, शिल्पकला व ओरिगामी प्रशिक्षण, इंग्रजी प्रयोगशाळा, सैनिकांप्रती कृतज्ञता व्यक्त करण्यासाठी अहंम भारत, समाजसेवा शिबिरे, स्पर्धा परीक्षांसाठी मार्गदर्शन आदी वैशिष्ट्यपूर्ण उपक्रम शाळेत राबविले जातात अशी माहिती शाला समितीचे अध्यक्ष डॉ. सुनील भंडगे यांनी दिली आहे.