पुणे- डेक्कन एज्युकेशन सोसायटीच्या नवीन मराठी शाळेत मापन या संकल्पनेवर आधारित गणित प्रयोगशाळेचे उद्घाटन गणित तज्ज्ञ प्रदीप आगाशे यांच्या हस्ते करण्यात आले. गणिताचा अभ्यास हसत-खेळत करण्यासाठी गणित प्रयोगशाळेचा उपक्रम महत्वाचा असल्याचे मत श्री. आगाशे यांनी व्यक्त केले.
सोसायटीच्या नियामक मंडळाचे अध्यक्ष डॉ. शरद कुंटे, न्यू इंग्लिश स्कूल टिळक रोडचे मुख्याध्यापक नागेश मोने, प्रयोगशाळेचे निर्माते सुधीर नारखेडे, मुख्याध्यापिका कल्पना वाघ यांची प्रमुख उपस्थिती होती.
वार, दिनांक, महिने, उंची, वजन, दिशा, आकार, अंतर, द्रव पदार्थ आदीचे मापन करण्याच्या पध्दती शिकण्यासाठी आवश्यक खेळणी प्रयोगशाळेत मांडण्यात आली आहेत. विद्यार्थ्यांचे कार्यकौशल्य विकसित करणे व बुध्दीला चालना देण्यासाठी प्रयोगशाळा उपयुक्त ठरणार आहे.
मुख्याध्यापिका कल्पना वाघ यांच्या मार्गदर्शनाखाली भाग्यश्री हजारे, तनुजा तिकोने, वंदना कदम, अश्विनी राजवाडे, वैशाली जाधव, प्रिया इंदूलकर या शिक्षकांचे प्रयोगशाळा निर्मितीत महत्वाचे योगदान आहे.