पुणे -कर्नाटकातील भाजपचा बहुमताचा कांगावा न्यायालयाच्या निर्णयामुळे उघड झाल्याने- मनसेच्या रुपाली पाटील, कॉंग्रेसच्या कमल व्यवहारे यांनी बाजीराव रस्त्यावर फुगडी खेळून आनंदोत्सव साजरा केला . यावेळी सर्वपक्षीय कार्यकर्त्यांनी साखर वाटून ,पेढे वाटून, फटाके फोडून येथे मोदींविरोधात घोषणाबाजी करत , आनंदोत्सव साजरा केला.
कर्नाटक विधानसभेत बहुमत सिद्ध करण्यासाठी आवश्यक असलेलं संख्याबळ आपल्याकडे नसल्याची जाणीव झाल्यानंतर भाजपचे मुख्यमंत्री बी एस येडियुरप्पा यांनी आज बहुमत चाचणीआधीच मुख्यमंत्रिपदाचा राजीनामा दिला.आणि अखेर कर्नाटकातील सत्तास्थापनेच्या नाटकावर पडदा पडला. याचे जोरदार सेलिब्रेशन पुण्यात कॉंग्रेस , महाराष्ट्र नवनिर्माण सेना, राष्ट्रवादी काँग्रेस, शिवसेना यांनी केलं .
हे सर्वपक्षीय सेलिब्रेशन करण्याचे कारण म्हणजे भाजपने हिटलरशाही पद्धतीने राजकारण खालच्या पातळीवर नेवून ठेवलेल्या राजकारणाला चपराक बसल्याने केल्याचे मनसेच्या रुपाली ठोंबरे पाटील यांनी सांगितले. म्हातारी मेल्याचे दुःख नाही पण त्यामुळे काळ सोकावत होता. भाजपने साम, दाम, दंड, भेद वापरून लोकशाहीला झुकवण्याचा प्रयत्न केला. मात्र त्यात त्यांना बसलेल्या दणक्याचे आम्ही एकत्रित सिलिब्रेशन केल्याचे त्यांनी स्पष्ट केले. यात काँग्रेसच्या कमल व्यवहारे, हृषीकेश बालगुडे, राष्ट्रवादी काँग्रसचे अजय दराडे, संग्राम होनराव, शिवसेनेचे नितीन परदेशी, चंदन साळुंके, मनसेचे वसंत खुटवड, मनीषा कावेडिया आदींसह कार्यकर्ते मोठ्या संख्येने सहभागी झाले होते.