पुणे, ३ जानेवारी २०१७ : ज्येष्ठ माजी पत्रकार व ‘इन्स्पिरेशन्स पीआर’ या जनसंपर्क संस्थेचे व्यवस्थापकीय संचालक रुप कर्नानी (वय ६२) यांचे नुकतेच (३१ डिसेंबर) हृदयविकाराच्या धक्क्याने येथे आकस्मिक निधन झाले. त्यांच्या मागे पत्नी उषा, मुलगी प्रेरणा, तसेच रुप यांचा लहानपणापासून सांभाळ करणारे मामा भगवान खिलनानी (वय ९४) आणि मावशी शकुंतला खिलनानी (वय ९१) असा परिवार आहे.
रुप कर्नानी यांनी बिझनेस इंडिया या नियतकालिकात एक दशक काम केले. त्यानंतर ते बिझनेस टुडे या नियतकालिकाचे सहाय्यक संपादकही राहिले. नंतर त्यांनी ‘इन्स्पिरेशन्स पीआर’ ही स्वतःची जनसंपर्क संस्था स्थापन केली. त्यांना अनेक पुरस्कारांनी गौरवण्यात आले होते. त्यात ‘इंडिया ट्रॅव्हल ॲवॉर्ड फॉर बेस्ट कम्युनिकेटर’ (ऑगस्ट २०१४), ‘रोटरी ॲवॉर्ड फॉर लाईफटाइम अचिव्हमेंट’ (जून २०१४), केंद्रीय मंत्र्यांच्या हस्ते पीआर कौन्सिल ऑफ इंडिया, नवी दिल्ली यांचा ‘चाणक्य पुरस्कार’ (मार्च २०१५), ‘रोटरी व्होकेशनल सर्व्हिस ॲवॉर्ड’ २००९ – २०१०, आजीवन योगदान व कल्पक कामगिरीसाठी ‘लाईफ टाईम अचिव्हमेंट ॲवॉर्ड’ २०१४ व पीआरसीआय बेस्ट इमर्जिंग पीआरसीआय चॅप्टर पुणे (वर्ष २०१०) यांचा समावेश आहे. रुप कर्नानी हे लेखकही होते. फिरोदिया समूहाचे संस्थापक कै. एच. के. फिरोदिया यांचे चरित्र त्यांनी लिहीले आहे.
