रोहा व चाकण येथील बलात्कार व निघृण खून प्रकरणांची सुनावणी फास्ट ट्रॅक न्यायालयात होणार

गृहमंत्री अनिल देशमुख यांचे
विरोधी पक्ष नेते प्रविण दरेकर यांना आश्वासन
मुंबई दि. २९ : रोहा येथील तांबडी गावात एका अल्पवयीन मुलीवर बलात्कार आणि निघृण खून तसेच चाकण येथील एका युवतीला विवस्र करून खून केल्याच्या प्रकरणांमध्ये पंडितांना लवकर न्याय मिळावा, यासाठी हे खटले फास्टट्रॅक कोर्टात चालविण्यात येतील तसेच या दोन्ही प्रकरणात विशेष सरकारी वकिलांची नियुक्त करण्यात येईल असे आश्वासन गृहमंत्री अनिल देशमुख यांनी आज विधानपरिषदेचे विरोधी पक्ष नेते प्रविण दरेकर यांना दिले.
माणुसकीला काळीमा फासणा-या या दोन्ही प्रकरणांमध्ये पिडितांच्या कुटुंबियांना न्याय मिळायाला हवा व हे क्रुर कृत्य करणा-या गुन्हेगारांना कठोर शिक्षा होण्याच्या दृष्टीने हे प्रकरण फास्ट ट्रॅक न्यायालयात चालविण्याची मागणी आज विरोधी पक्ष नेते दरेकर यांनी आज गृहमंत्री अनिल देशमुख यांची मंत्रालयात भेट घेऊन केली.
सामान्यपणे न्यायालयात सुनावणीस दीर्घकाळ लागतो. अनेक वर्षे खटले चालतात. त्यामुळे पीडितांना लवकर न्याय मिळण्यास विलंब होतो. म्हणून या दोन्ही प्रकरणांची सुनावणी फास्टट्रॅक कोर्टात घेण्यात यावी, त्यासाठी राज्य सरकारच्या वतीने दोन्ही प्रकरणात विशेष सरकारी वकील नियुक्त करण्याची मागणीही दरेकर यांनी गृहमंत्री देशमुख यांच्याकडे केली. याप्रकरणी सविस्तर चर्चा झाल्यानंतर गृह मंत्री देशमुख यांनी या प्रकरणांची दखल घेत या दोन्ही प्रकरणांसाठी सकारच्यावतीने विशेष सरकारी वकील उपलब्ध करुन देऊन हे प्रकरण फास्ट ट्रॅक न्यायालयात घेण्यात येईल असे आश्वासन गृहमंत्री देशमुख यांनी दिल्याची माहिती विरोधी पक्ष नेते दरेकर यांनी यावेळी दिली.