‘संतूर धून मंतरलेली’ने प्रेक्षकांना जिंकले

पुणे -पुणे फेस्टिवलमध्ये यशवंतराव चव्हाण नाट्यगृह येथे  ख्यातनाम संतूर
वादक श्री. मदन ओक(अमेरिका) आणि जेष्ठ तबलावादक पं.रामदास पळसुले यांनी सादर केलेल्या
‘संतूर धून मंतरलेली’कार्यक्रमाने प्रेक्षकांना मंत्रमुग्ध केले.
प्रख्यात कलावंत पं.शिवकुमार शर्मा यांचे शिष्य असणारे जेष्ठ संतूरवादक पंडित मदन ओक हे
या कार्यक्रमासाठी आवर्जुन अमेरिकेहून आले.त्यांनी सुरुवातीस रागपुरिया कल्याण मध्ये आलाप
जोड,रुपक मध्य व द्रुत तीनतालमध्ये अनवट रचना व नंतर मिश्र पहाडी रागात दादरा व अति
जलद लयीत तीनतालात रचना सादर करून प्रेक्षकांना मंत्रमुग्ध केले.पं.रामदास पळसुले यांनी
तबल्यावर केलेली साथ अतिशय कसदार ठरली.प्रत्येक रागानंतर प्रेक्षकांची’क्या बात हे’ही दाद
मिळत गेली व पुणेकरांसाठी एक सुरेल मैफिल पर्वणीच ठरली.जेष्ठ निवेदिका नीरजा आपटे यांनी
या मैफिलीचे सूत्रसंचालन केले.
पुण्याच्या महापौर मुक्ता टिळक व त्यांचे पती या कार्यक्रमासाठी आवर्जून उपस्थित
होते.त्यांच्या हस्ते कलाकारांचा गौरव करण्यात आला.त्यावेळी पुणे फेस्टिवलचे मुख्य संयोजक
कृष्णकांत कुदळे,सांस्कृतिक कार्यक्रम प्रमुख मोहन टिल्लू,उगवते तारे व इंद्रधनुचे संयोजक रवींद्र
दुर्वे उपस्थित होते.पुणे फेस्टिवलचे यशवंतराव चव्हाण नाट्यगृह प्रमुख अतुल गोंजारी यांनी
आभार प्रदर्शन केले. रोहन बिल्डर्स व परांजपे स्कीम्स कन्सट्रकशन लि हे याचे प्रायोजक होते.