पुणे – छोटा राजन टोळीतील गुंडाला सहकारनगर पोलिसांनी बालाजी नगरातून जेरबंद केले. स्वप्नील सुनिल कुलकर्णी ( २७, धनकवडी ) असे त्या कुख्यात गुंडाचे नाव असून त्याच्याकडून एक कार्बाइन, तीन पिस्तूल व २१ जीवंत काडतुसे जप्त करण्यात आले आहे.
पोलिसांनी जप्त केलेली काडतुसे खडकी येथील अ‍ॅनिमेशन फॅक्टरीतील असल्याचे निष्पन्न झाल्याची माहिती परिमंडल २ चे पोलीस उपायुक्त पंकज डहाणे यांनी गुरुवारी पत्रकार परिषदेत दिली.
यावेळी पोलिसांनी दिलेल्या माहितीनुसार ; स्वप्नील बालाजीनगर येथे येणार असल्याची माहिती खबऱ्याने सहकारनगर पोलीस ठाण्यातील नाईक संजय भापकर यांना दिली होती.या माहितीनुसार उपायुक्त डहाणे, स्वारगेट विभागाचे सहाय्यक पोलीस आयुक्त डॉ. शिवाजीराव पवार यांच्या मार्गदर्शनाखाली सहकार नगर पोलीस ठाण्याचे वरीष्ठ निरीक्षक दिपक निकम, गुन्हे शाखेचे निरीक्षक आप्पासाहेब वाघमारे , सहाय्यक निरीक्षक चेतन मोरे, हवालदार अभिमन्यु सोनवणे, विजय मोरे, चंद्रकांत फडतरे, सतिश चव्हाण, मनिष इंगळे, प्रविण कोकणे यांच्या पथकाने सापळा रचून स्वप्नील कुलकर्णी याला ताब्यात घेतले. यावेळी पोलिसांनी कुलकर्णी याच्या ताब्यातून एक कार्बाइन, ३ देशी बनावटीचे पिस्तूल, २१ जिवंत काडतुसे असा एकूण २ लाख ४ हजार ४०० रुपयाचा शस्त्रसाठा जप्त केला.
त्याचे वडील गुजरातमध्ये रेल्वे टीसी हेड म्हणून कामास होते. बारावीपर्यंत शिक्षण झालेला स्वप्नील कुलकर्णी विरार येथे रहात होता. त्यावेळी शेजारी राहणार्‍या व छोटा राजन टोळीचा सदस्य असलेल्या रोहित वर्मा नावाच्या तरुणामार्फत तो २०१० पासून छोटा राजन टोळीशी जोडला गेला. एका गुन्ह्यात जेलमध्ये गेल्यानंतर त्याचा संपर्क इतर गुंडाशी झाला. पुढे त्याने २०१२ मध्ये शिवाजीनगर न्यायालयात गोळीबार केला होता. याच दरम्यान तो छोटा राजन टोळीच्या गुंडांच्या संपर्कात आला.
स्वप्नील कुलकर्णी याच्यावर पुणे शहरात खून, खुनाचा प्रयत्न, मारामारी जबरी चोरी असे गुन्हे दाखल आहेत. सद्या त्याच्या कारवाया मुबई व परिसरात सुरू आहेत. काही दिवसापासूनच तो धनकवडी येथे खोली भाड्याने घेऊन रहायला आला होता. त्याला २०१५ मध्येही पोलिसांनी अटक केली होती. दरम्यान पोलिसांनी त्याच्याकडून जप्त केलेली शस्त्रे त्याच्या एका साथीदाराने नाशिक येथे त्याला दिली होती.
या शस्त्रांचा वापर करुन तो एका व्यक्तीचा खून करणार होता. कोणत्या व्यक्तीचा खून करायचा होता, हे त्या साथीदाराने स्वप्नील कुकलर्णी याला अद्याप सांगितले नसल्याचे त्याने पोलिसांना सांगितले आहे. पोलिसांनी जप्त केलेली काडतुसे खडकी येथील अ‍ॅनिमेशन फॅक्टरी येथील असल्याचे पोलीस उपायुक्त पंकज डहाणे यांनी सांगितले आहे. त्या दृष्टीने तपास सुरू असल्याचेही डहाणे यांनी सांगितले.
