मुंबई-मुंबई. स्टॅच्यू ऑफ युनिटी म्हणून जगातली सर्वात मोठी सरदार पटेल यांची मूर्ती बनवून पद्मभूषण राम सुतार यांनी जगातील भारताचा गौरव वाढवला आहे. सुतार हे ‘भारताचे कोहिनूर’ आहेत आणि आपल्याला सर्वांना त्यांचा जाहीर सत्कार करण्याची संधी मिळाली ही गर्वाची गोष्ट आहे. महाराष्ट्राचे वित्त आणि वन मंत्री सुधीर मुनगंटीवार यांनी असे वक्तव्य विश्व प्रसिद्ध शिल्पकार पद्मभूषण सुतार यांचा सन्मान करताना केले. सुतार यांचा मुंबईच्या ५० हून अधिक सामाजिक संस्थांच्या वतीने जाहीर सत्कार करण्यात आला. याप्रसंगी मुनगंटीवार आणि भाजपचे वरिष्ठ आमदार मंगल प्रभात लोढा यांनी सुतार यांना सरस्वती देवीची प्रतिमा आणि पुष्पगुच्छ देऊन सत्कार केला. प्रसिद्ध पुस्तक ‘परमवीर’च्या लेखिका श्रीमती मंजू लोढा यांनी सर्व मान्यवरांचे स्वागत केले.
मकर संक्रातीच्या मुहूर्तावर हा सत्कार समारंभ ‘लोढा वर्ल्ड टॉवर’मध्ये आयोजित करण्यात आला होता. जगातील सर्वात मोठी मूर्ती निर्माण करणाऱ्या राम सुतार यांचा सत्कार ‘वर्ल्ड टॉवर’ बिल्डींगमध्ये होत आहे, ही एक अद्भुत गोष्ट असल्याचेही मुनगंटीवार म्हणाले. आपल्या सत्कार प्रसंगी पद्मभूषण शिल्पकार राम सुतार यांनी सरदार पटेल यांची जगातील सर्वात उंच मूर्ती आणि आपल्या सर्व रचनांचं श्रेय भारतीय संस्कृती आणि परंपरेला दिलं. या समारंभात आमदार लोढा म्हणाले की, जगातील सर्वात उंच पुतळा ‘स्टॅच्यू ऑफ युनिटी’चे शिल्पकार राम सुतार हे सरळ, सामान्य असूनही महान आणि उच्च व्यक्तिमत्वाचे धनी आहेत, यांचा सत्कार आमच्या सर्वांच्या हातून होत आहे. ही एक महत्त्वपूर्ण गोष्ट आहे.
या कार्यक्रमात ५०हून अधिक देशातील प्रतिष्ठित व्यक्ती, सामाजिक आणि सांस्कृतिक संस्थांचे प्रतिनिधी आणि केंद्रीय मंत्री रामदास आठवले यांच्या पत्नी सीमा आठवले उपस्थित होत्या. या कार्यक्रमाला मुंबईतील प्रतिष्ठित व्यक्तींनी हजेरी लावली होती. यावेळी युनियन बँक ऑफ इंडियाचे चेअरमन केवल हांडा आणि राजेंद्र जाधव व्यासपीठावर उपस्थित होते. लोढा फाउंडेशनच्या मार्गदर्शनाखाली डॉ. द्वारकानाथ कोटणीस रिसर्च ब्यूरो आणि लाडले इन्फो यांच्या संयुक्त विद्यमाने हा कार्यक्रम आयोजित करण्यात आला होता. या कार्यक्रमात कला-संस्कृती समाजसेवक आणि विविध क्षेत्रातील अनेक मान्यवर उपस्थित होते.