मुंबई -कालच न्यायालयाने किरीट सोमय्या यांचा अटकपूर्व जामीन फेटाळला होता. आज नील याचाही जामीन अर्ज कोर्टाने फेटाळला , त्यामुळेआज किरीट सोमय्यांच्या घरी पोलिस दाखल झाले आहेत. INS विक्रांतप्रकरणी चौकशीसाठी उद्या पोलिसांसमोर हजर राहण्यासाठी पोलिसांनी घरी समन्स बजावले असून याबाबतची नोटीसही देण्यात आली आहे. या नोटीशीनंतरही किरीट सोमय्या पोलिसांसमोर हजर न झाल्यास त्यांना फरार केले जाण्याची शक्यता आहे. त्यामुळे सोमय्यांसमोरील अडचणी आता वाढताना दिसत आहे.
किरीट सोमय्या व नील सोमय्याही अजून भूमिगत आहेत. अशातच आज आर्थिक गुन्हे शाखेच्या अधिकाऱ्यांनी किरीट व नील सोमय्या यांच्या कार्यालयावरही धाड टाकली आहे. तेथे अधिकाऱ्यांकडून कार्यालयातील कागदपत्रे तपासली जात आहे. या कारवाईबाबत पोलिसांनी माहिती देण्यास नकार दिला आहे. INS विक्रांत प्रकरणी सोमय्यांविरोधात दाखल गुन्ह्यावर पुढील कारवाई करण्यासाठी आपण येथे आलो असल्याचे अधिकाऱ्यांनी सांगितले आहे. याशिवाय सोमय्यांच्या कार्यालयातही उद्या चौकशीसाठी हजर राहण्याची नोटीस पोलिसांनी बजावली आहे.
दरम्यान, किरीट सोमय्या आज व्हिडिओच्या माध्यमातून समोर आले आहे. ट्विटरवर व्हिडिओ जारी करत आपल्याविरोधात कितीही आरोप केले तरी आपण दबणार नाही. महाविकास आघाडीचे घोटाळे बाहेर काढतच राहू, असे त्यांनी म्हटले आहे. तसचे, INS विक्रांतला वाचवण्यासाठी गोळा केलेल्या निधीबाबत उच्च न्यायालयात सर्व माहिती देऊ, असेही त्यांनी सांगितले आहे. मात्र, आपण सध्या कुठे आहोत याची माहिती त्यांनी दिली नाही.
