मांजरीबुद्रुकमध्ये अनधिकृत बांधकामांवर पीएमआरडीएकडून कारवाई

पुणे-– पुणे महानगर प्रदेश विकास प्राधिकरणा (पीएमआरडीए) च्यावतीने मौजे
मांजरी बुद्रुक, तालुका हवेली, सर्वे नंबर १०४/१९ मधील ४५०९ चौ.फूट आकारातील
अनधिकृत बांधकाम कारवाईस मोठ्या प्रमाणात विरोध होऊन सुद्धा पीएमआरडीएने ही
कारवाई करून बांधकाम जमीनदोस्त केले.
महाराष्ट्र प्रादेशिक नगररचना अधिनियम १९६६च्या कलम ५३ (१) अन्वये संबधिताना
प्रत्येकी दोनदा नोटीसा देऊनही त्यांनी अनधिकृत बांधकामे सुरु ठेवली होती. सदरील
बांधकामाचे क्षेत्रफळ हे एकूण ४५०९ चौरस फूट आरसीसी स्वरुपात चार माजली स्वरूपातील
हे बांधकाम होते. सदरची अनधिकृत बांधकाम निष्कासनाची कारवाई पीएमआरडीएच्या
अनधिकृत बांधकाम व निष्कासन पथक क्रमांक एक मार्फत करण्यात आली.
अनधिकृत बांधकाम निष्कासन कारवाईवेळी पीएमआरडीएचे पोलीस निरीक्षक राजकुमार शेरे,
(प्रभारी तहसीलदार) उपअभियंता राजेंद्र मेदनकर, उपअभियंता सुर्यकांत कापसे, सह्यक
अभियंता राजेश्वर मंडगे, , कनिष्ठ अभियंता योगेश दिघे, तसेच हडपसर पोलीस स्टेशनचे
पोलीस निरीक्षक विष्णू पवार, पोलीस निरीक्षक अंजुम बागवान स्थानिक पोलीस अधिकारी व
कर्मचारी यांच्या बंदोबस्ताच्या नियंत्रणाखाली व सहकार्याने सदरील कारवाई पार पाडण्यात
आली.
पीएमआरडीएचे महानगर आयुक्त किरण गित्ते यांनी नागरिकांनी सदर सदनिका खरेदी
करताना सावधगिरी बाळगावी. अनधिकृत सदनिका खोटी माहिती देऊन स्वस्त दराचे आमिष
दाखवून नागरिकांची फसवणूक केली जाते, नागरिकांचे आर्थिक नुकसान टळावे याकरिता
नागरिकांनी जागरूक राहावे. नागरिकांनी शहानिशा करूनच सदनिका खरेदी कराव्यात असे
आवाहन महानगर आयुक्तांनी केले