वाघोली पाणीपुरवठा योजेनेसाठी जागा निश्चित… पीएमआरडीए निविदा काढणार

पुणे-– वाघोली गाव पुणे नजदीक असल्याने लोकसंख्या लक्षात घेता बांधकामामध्ये झपाट्याने वाढ
होत आहे. उपलब्ध जलसाठा लोकसंखेसाठी कमी पडत आहे. वाघोलीत वाढीव पाण्यासाठी ग्रामस्थ
पीएमआरडीएकडे पाठपुरावा करत होते, ही मागणी लक्षात घेता वाघोली पाणीपुरवठा योजनेसाठी जागा
निश्चित करून जलशुद्धीकरण केंद्रासाठी देखील जागा पाहणी करण्यात आली. तसेच पिण्याच्या पाण्याचा प्रश्नही
यामुळे मिटणार आहे. याकरिता अंदाजपत्रक तयार करून लवकरच निविदा मागविण्यात येणार आहेत.
यावेळी पीएमआरडीए महानगर आयुक्त किरण गित्ते, आमदार बाबुराव पाचर्णे, माजी जिल्हापरिषद सदस्य
रामभाऊ दाभाडे, वाघोली सरपंच वसुंधरा उबाळे, तसेच माजी सरपंच आव्हाळवाडी, वाघोली पंचायत समिती
सदस्य तसेच पीएमआरडीएचे अधिकारी व ग्रामस्थ उपस्थित होते.
वाघोलीच्या चार रस्त्यांना पीएमआरडीएकडून ‘ना हरकत’
पुणे महानगर प्रदेश विकास प्राधिकरणाने (पीएमआरडीए) वाघोलीतील सोसायट्यांकडे जाणाऱ्या मुख्य
रस्त्यांना ग्रामपंचायतीच्या माध्यमातून चार रस्त्यांना ‘ना हरकत’ दिली आहे. सबंधित रस्त्यांची पाहणी दि.
२६ ला (मंगळवारी) सकाळी ९ वाजता करण्यात आली. मुख्य चार रस्त्याचे कामकाज करण्यासाठी हे रस्ते
ग्रामपंचायतीकडे हस्तांतरित करण्यात आले आहेत. ग्रामपंचायत स्वखर्चातून हे रस्ते करणार आहेत. वाघोली
येथील नगररोड ते आयव्ही इस्टेट रस्ता, बायफ रोड ते आरएमसी रोड, नगररोड ते प्रिस्टांईन सातव जुनिअर
कॉलेज या रस्त्यांचे कामकाज केले जाणार आहेत.
ग्रामपंचायतीच्यावतीने या रस्त्याची मागणी करण्यात आली होती. यामुळे रस्त्यांचा मार्ग मोकळा झाला आहे.
आयव्ही सोसायटी समोर तात्पुरता रस्ता करण्यात येणार आहे. तसेच या भागातील रस्त्यांसोबतच ड्रेनेज,
पाणी व्यवस्थेची माहिती घेण्यात आली. त्याचप्रमाणे नगर रस्त्यास पर्यायी बायपास उपलब्ध होतील अशा
रस्त्यांची पाहणी करण्यात आली. तसेच वाघोली अग्निशमन केंद्रालाही भेट देण्यात आली. प्रस्तावित
आव्हाळवाडी व वाघोली येथील रिंगरोडची देखील चर्चा करण्यात आली.