प्राधिकरण क्षेत्रात सुविधा पुरविण्यासाठी पीएमारडीएचे वडगाव मावळ येथे क्षेत्रीय कार्यालय

पुणे-पुणे महानगर प्रदेश विकास प्राधिकरण(पीएमारडीए)च्या माध्यमातून ग्रामीण भागात नागरी
सुविधा पुरविण्यासाठी वडगाव मावळ येथे दुसरे क्षेत्रीय कार्यालय सुरू करण्यात आले आहे. अन्न आणि
औषध प्रशासन, संसदीय कार्य तथा पालकमंत्री गिरीष बापट यांच्या हस्ते क्षेत्रीय कार्यालयाचे उदघाटन
करण्यात आले.
सोमवारी दि. २९ ऑक्टोबर रोजी हवेली तालुक्यातील वडगाव पंचायत समिती येथे हा कार्यक्रम पार पडला.
कार्यक्रमास मा. ना. पालकमंत्री गिरीष बापट, मावळ लोकसभा मतदारसंघाचे खासदार श्रीरंग बारणे,
आमदार बाळा भेगडे, पीसीएनटीडीएचे अध्यक्ष सदाशिव खाडे, महानगर आयुक्त किरण गित्ते, सभापती
गुलाब म्हाळसकर, उपसभापती शांताराम कदम, नगराध्यक्ष मयूर ढोरे, उपनगराध्य अर्चना ढोरे,
उपजिल्हाधिकारी सुहास मापारी, अधीक्षक अभियंता मिलिंद बोंगाळे, कार्यकारी अभियंता भरत कुमार
बाविस्कर आदी मान्यवर उपस्थित होते.
मा. पालकमंत्री गिरीष बापट म्हणाले की,’पुणे विभागाबरोबरच ग्रामीण भागाच्या विकासासाठी
पीएमआरडीए आहे. भविष्यात तिसरी मुंबई व्हायची असेल तर तळेगाव हा विकासाचा केंद्र बिंदू असणार
आहे. रस्ते, वीज, पाणी, ड्रेनेज या मूलभूत सुविधा पीएमारडीएच्या माध्यमातून दिल्या जाणार आहेत.
एमआयडीसीला जोडणारे सर्वात तीन मोठ्या रस्त्याचे काम पीएमआरडीएच्या माध्यमातून हाती घेतले जाणार
आहे. नागरिकांना कामकाज सोईचे पडेल अशा दृष्टीने सदरचे कार्यालय आहे.’
आमदार बाळा भेगडे म्हणाले, ‘पीएमारडीएच्या माध्यमातून ग्रामीण विकासाला गती मिळणार आहे. जांभूळ
ते सांगवी, कोठुरने ते मळवंडी ठुले, सोमटणे फाटा ते तळेगाव हे 10 किलोमीटरच्या रस्त्यांचे कामकाज
पीएमारडीएच्या करणार आहे. तसेच अनधिकृत बांधकामे नियमित करण्याचे काम या स्थानिक
कार्यालयातून होणार असल्याने आम्हांला दिलासा मिळाला आहे. ग्रामीण भागाला खऱ्या अर्थाने कायापालट
करण्याचे काम पीएमआरडीए करत आहे.
महानगर आयुक्त किरण गित्ते म्हणाले, ‘पुणे व पिंपरी चिंचवडचा मोठ्या प्रमाणात विकास होत असताना
पायाभूत सुविधा निर्माण करण्यासाठी पीएमारडीएची स्थापना झाली आहे. नागरिकांना सर्व कामकाज
सोईच्या दृष्टीने व्हावे याकरिता चार कार्यालय स्थापन करण्यात आले आहे.
मावळ व खेड तालुक्यासाठी बांधकाम परवानगी व झोन दाखला, अनधिकृत बांधकाम तक्रारी निवारण
यासारख्या अनेक कामकाजासाठी पीएमारडीएच्या औंध कार्यालयात जावे लागणार नाही. सर्व पायाभूत
सुविधा निर्माण करण्यासाठी ग्रामपंचायती सोबत राहून पीएमारडीए काम करणार आहे. नागरिकांचा वेळ
वाचण्यास मदत होणार आहे. या उद्देशाने वडगाव मावळ येथील प्रादेशिक कार्यालय सुरू करण्यात आले
आहे.’