पुणे ; मायमराठी ने दिलेल्या वृत्तानुसार नगरसचिव कार्यालयात काम करणाऱ्या आणि 5 महिने पगार प्रलंबित ठेवलेल्या 19 सफाई कामगाराना अखेर डच्चू देवून त्यांना पुन्हा बेरोजगारीच्या खाईत ढकलल्या नंतर महापौर ;उपमहापौरांचे पीए यांच्यासह नगरसचिव कार्यालयातील आणखी 31जागांवर काम करणाऱ्या कर्मचाऱ्यांच्या नेमणुकांबद्दल देखील संशयाच्या भोवऱ्यात सापडल्याचे स्पष्ट झाले आहे . हे 31 कामगार खरोखर महापालिकेचे अधिकृत कर्मचारी असतील तर त्यांच्या नेमणुका प्रत्यक्षात कागदोपत्री आहेत कुठे ? जिथे आहेत तिथे ते काम का करत नाहीत ? ते ज्या जागांवर काम करतात तिथे अधिकृतपणे काम करतात काय ? या प्रश्नांची उत्तरे अद्याप कोणी दिलेली नाहीत .
गेल्यावर्षी मिळकतकर विभागात अनधिकृत पणे काम करणारा एक कर्मचारी ‘मायमराठी’ ने कॉंग्रेसचे गट नेते अरविंद शिंदे आणि नगरसेवक अविनाश बागवे यांच्या मदतीने रंगेहाथ पकडल्यानंतर तत्कालीन मिळकतकर प्रमुख सुहास मापारी यांनी त्यावर पोलीस कारवाई केली . मात्र भूमी जिंदगी विभागात दुसरा अनधिकृतपणे काम करणारा कर्मचारी ‘माय मराठी’ ने नगरसेवक महेश वाबळे यांच्या मदतीने रंगेहाथ पकडून दिल्यानंतर तत्कालीन विभाग प्रमुख सतीश कुलकर्णी यांनी त्यावर कोणतीही कारवाई केली नव्हती .यानंतर महापालिकेच्या मुख्य भवनात विविध खात्यात ज्यांना अपाॅईंटमेंट लेटर नाही , अधिकृत पगार नाही अशा 72 कर्मचाऱ्यांची यादी ‘माय मराठी’ ने जाहीर केली होती . त्यामुळे या सर्वांना आयत्याच कुठल्या तरी ठेकेदराच्या माथी मारून त्यांना कामावर दाखविण्याचे प्रयत्न त्यानंतर झाले . म्हणजे तरुणाईला अगोदर अनधिकृतपणे बिनपगारी कर्मचारी म्हणून राबवून घ्यायचे आणि नंतर उघड झाल्यावर त्यांना कंत्राटी कामगार बनविण्यासाठी टेंडर ,ठेकेदार पद्धती अवलंबण्याचा प्रयत्न करायचा असा प्रकार सुरु असताना आता नगरसचिव कार्यालयातला आणखी मोठा कर्मचारी घोटाळा ‘माय मराठी ‘ पर्यंत पोहोचला आहे.
जानेवारी २०१८ पासून बिनपगारी १९ सफाई कर्मचारी नगरसचिव कार्यालयात काम करत असल्याचा प्रकार चव्हाट्यावर आणल्यानंतर त्यांचे प्रत्येकी ८ हजार रुपये महिना प्रमाणे पगार देण्या च्या हालचाली 2 दिवसांपूर्वी करण्यात आल्या .पण अखेरीस त्यांना बेरोजगार बनवून काढून टाकण्यात आले . स्थायी समिती अध्यक्षांच्या कार्यालया पासून ते महापौर बंगल्यापर्यंत सफाईचे काम करणाऱ्यांची हि दुरावस्था खरोखर दयनीय होती .या सर्वांच्या जागांवर आता अन्य खात्यात काम करणारे 17 कर्मचारी पाचारण करण्यात आले आहेत.
त्यानंतर अधिक माहिती घेता …नगरसचिव कार्यालयातील हि सेवा ज्येष्ठता यादी आमच्या हाथी आली आहे .
पहा हि यादी .. आणि पहा यात स्पष्ट नमूद करण्यात आलेले आहे ,कोण कोणत्या जागा रिक्त आहेत ते …
…महापौर ,उपमहापौर यांच्या स्वीय सहायकाच्या म्हणजे पी ए च्या जागा देखील रिक्त असल्याचे त्यात स्पष्ट म्हटले आहे . अशा एकूण ३१ जागा रिक्त आहेत . परंतु प्रत्यक्षात या जागांवर विविध लोक काम करताना तर दिसत आहेत .हे गौड बंगाल काय आहे हे स्थायी समिती अध्यक्षांनी हि कायम झाकली मुठ आता उघडून सत्य बाहेर आणावे अशी मागणी होते आहे . कामगार कायदे पाळले जातात काय / रिक्त जागांवर योग्य पद्धतीने नेमणुका/ भरती केली जाते काय / या प्रश्नांकडे लक्ष देवून स्थायी समिती अध्यक्ष यांनी कामगारांच्या प्रश्नांवर आणि कामगार कायद्यातील तरतुदींबाबत योग्य ती तातडीने दक्षता घेवून कर्मचारी भरती विषयातला अंधार दूर करावा अशी मागणी होते आहे .
