पार्किंग लॉट बिल्डरांच्या घशात आणि शुल्कासाठी मात्र हाथ नागरिकांच्या खिशात …
पुणे- प्रत्येक वाहनासाठी पार्किंग शुल्क नावाने घराघरातून ,प्रत्येक नागरिकाच्या खिशातून पैसा ओरबाडू पाहणाऱ्या महापालिकेचा कारभार म्हणजे ‘वाईट तितुके इथे पोसले ,भलेपणाचे भाग्य नासले ..प्रजा आंधळी अधांतरी दरबार ‘असल्याचे स्पष्ट होत आहे . पालकमंत्री गिरीश बापट ६२ पार्किंग लॉट बीओटी वर विकसित करण्याची भाषा करत असताना गेल्या दहा वर्षात शहरातील ६२ पार्किंग लॉट कोणकोणत्या बिल्डरांच्या घशात घालण्यात आले त्याकडे जाणून बुजून दुर्लक्ष करीत असल्याचे दिसते आहे . पार्किंग लॉट वर बहुमजली व्यापारी संकुले बांधण्यात आल्याचे ६२ प्रकार पुण्यात घडले असून हा ‘पार्किंग लॉट घोटाळा’ बाहेर काढण्यास का कोणी पुढे येत नाही ? असा ही सवाल या निमित्ताने पुढे येतो आहे .
या पार्किंग लॉट चे पूर्वी कोणी काय केले ? यावर पडदा का टाकला जातो आहे ? अशा प्रश्नांहून मोठा आहे .इथला पार्किंग प्रश्न .. पण मुळातच तो निर्माण देखील राजकीय लोकांनीच केला आहे . बिल्डर आणि राजकारणी यांनी संगनमताने कायद्याच्या पळवाटांचा आधार घेत शहरातील ६२ पार्किंग लॉट लाटून आता पार्किंग शुल्क नागरिकांच्या खिशातून ओरबाडण्यासाठी घाट घातला आहे .
उदाहरणच द्यायचे झाले तर सातारा रस्त्यावर साईबाबा मंदिराशेजारी पार्किंग लॉट चे आरक्षण होते . याठिकाणी मोठ्ठे व्यापारी संकुल उभारले गेले . याठिकाणी पीएमपीएमएल च्या बसेस आणि खाजगी वाहने यासाठी बहुमजली पार्किंग व्यवस्था होण्या ऐवजी तिथे पालिकेच्या ताब्यात तळमजल्यावर पार्किंग व्यवस्था देवून बहुमजली व्यापारी इमारत उभी करण्यात आली .
अशा प्रकरणांकडे का दुर्लक्ष करण्यात आले ? आजूनही त्याकडे का पालकमंत्री बापट आणि भाजप शहराध्यक्ष योगेश गोगावले लक्ष देत नाहीत ? असे प्रश्न आहेत . आतापर्यंतचे पार्किंग लॉट ज्यांनी खाल्ले त्यांच्यावर प्रथम कारवाई करून नव्याने पार्किंग लॉट विकसित केले म्हणजे पुढचे पार्किंग धोरण -पॉलीसी व्यवस्थित राबविता येईल .
सातारा रस्त्यावरील ट्रक टर्मिनस च्या आरक्षणाची काय वाट लावून ठेवली आहे ते हि उघड्या डोळ्याने पाहता येईल . मटका अड्डे , अतिक्रमणे आदी गैरप्रकारांनी हा पार्किंग लॉट बिनकामाचा करून ठेवण्यात आला आहे . हीच बाब लुल्लानगर चौकानजीक कल्याण भेळ येथील पार्किंग लॉट च्या संदर्भात आहे . हा पार्किंग लॉट देखील अशाच पद्धतीने कायद्याच्या पळवाटा पाहून गायब करण्यात आला आहे . बेसमेंट पार्किंग महापालिकेकडे सोपवायचे आणि व्यापारी इमारत उभारायची अशा पद्धतीने हा पार्किंग लॉट ही बिल्डरच्या घशात घालण्यात आला आहे .इथेही महापालिका बहुमजली वाहनतळ करू शकत होती . एक ना अनेक पार्किंग लॉट अशा पद्धतीने हडप करून टाकण्यात आले आहेत . हा पार्किंग लॉट घोटाळा गोगावले आणि बापट यांनी अगोदर बाहेर काढावा त्यानंतर नव्याने पार्किंग लॉट विकसित करावेत आणि असे पुन्हा पुन्हा गैरप्रकार होणार नाहीत याची दक्षता घेणे जरुरीचे ठरणार नाही काय ?