– पुणे शहर पोलिसांकडे मागणी
पुणे (प्रतिनिधी) :शहरातील अत्यावश्यक सेवेतील दुकानांची वेळ सकाळी दहा ते दुपारी दोन वाजेपर्यंत असावी, अशी मागणी महापौर मुरलीधर मोहोळ यांनी पुणे पोलिसांकडे केली आहे. त्यावर तातडीने निर्णय घेतला जाण्याची शक्यता असून याबाबत आजच निर्णय होणार असल्याचे समजते आहे.
कोरोनाचा शहरातील वाढता प्रादुर्भाव लक्षात घेत शहर पोलिसांनी अत्यावश्यक सेवेतील दुकाने, भाजी विक्री यांची वेळ सकाळी दहा ते दुपारी बारा वाजेपर्यंत सुरू ठेवण्याची परवानगी आहे. परंतु वेळेअभावी नागरिकांची मोठ्या प्रमाणात दुकानासमोर गर्दी होत आहे, दुकानासमोर रांगा लागलेल्या दिसत आहेत. त्यामुळे सोशल डिस्टनसिंग पाळले जात नाही. जर दुकानांची वेळ दोन तासांनी वाढवली तर दुकानदार, नागरिक व तसेच पोलीस प्रशासनावरील ताण कमी होईल. यासाठी दुकानांची वेळ दोन तासांनी वाढवून सकाळी दहा ते दुपारी दोन वाजेपर्यंत करावी, अशी मागणी महापौर मोहोळ यांनी पुणे पोलीस आयुक्त के. वेंकटेशंम आणि सह आयुक्त डॉ. रविंद्र शिसवे यांच्याकडे केली आहे.
पोलीस प्रशासनाने दुकानांची वेळ वाढवून देण्याच्या मागणीबाबत अनुकूल प्रतिसाद देत लवकरच या बाबतचा रीतसर आदेश काढत अंमलबजावणी केली जाईल, अशी सकारात्मक भूमिका पोलिसांनी घेतल्याचे महापौर मोहोळ यांनी म्हटले आहे.