अॅड. एस. के. जैन, प्रमिला साकला, इंदर जैन व विशाल चोरडिया यांना पुरस्कार जाहीर
पुणे : जीतो पुणेच्या वर्धापन दिनानिमित्त देण्यात येणारे पुरस्कार जाहीर झाले असून यंदाचा जीवनगौरव पुरस्कार चंदुभाई शहा यांना देण्यात येणार आहे. तसेच, शिक्षण क्षेत्रातील कार्याबद्दल अॅड. एस. के. जैन, सामाजिक क्षेत्रातील योगदानाबद्दल प्रमिला साकला, उद्योग क्षेत्रातील उल्लेखणीय कार्याबद्दल इंदर जैन व तरुण उद्योजक म्हणून विशाल चोरडिया यांचाही पुरस्कार देऊन सन्मान करण्यात येणार आहे.
जीतो पुणेचे अध्यक्ष विजय भंडारी व मुख्य सचिव नरेंद्र छाजेड यांनी याविषयी माहिती दिली. येत्या 29 मार्चला (गुरुवार) गणेश कला क्रीडा रंगमंच येथे हा समारंभ सायंकाळी 6 वाजता होणार आहे. पुणे जिल्ह्याचे पालकमंत्री गिरीश बापट यांच्या हस्ते पुरस्कार वितरण होणार असून कार्यक्रमास आमदार माधुरी मिसाळ यांची प्रमुख उपस्थिती असणार आहे.
नवीन पिढीला आपली परंपरा व आपले संस्कार माहिती व्हावेत यादृष्टीकोनातून शास्त्राला अनुसरुन असलेला राहुल कपूर यांचा चरण स्पर्श कार्यक्रम यावेळी होणार आहे. तसेच, समाजाने समाजासाठी उभारत असलेल्या जीतो नगर प्रकल्पाची घोषणा यावेळी करण्यात येणार असून, त्याचा प्रारंभ यावेळी होणार आहे, असेही विजय भंडारी व नरेंद्र छाजेड यांनी सांगितले.