पुणे : मंडपवाले हे सामाजिक उपक्रम व सार्वजनिक उत्सवांचे अविभाज्य भाग आहेत. परंतु, मंडपवाल्यांना सरकार, प्रशासन आणि काही मंडळांकडून अनेकवेळा दुजाभावाची वागणूक मिळते. कारवाईच्यावेळी मंडपवाल्यांचे नुकसान होते. अनेकदा ठरलेली रक्कम मिळत नाही. सामानांची मोडतोडबरोबरत अनेक अन्यायकारक प्रकार मंडप व्यावसायिकांना एकी नसल्याने आजपर्यंत सोसावे लागले आहेत. असोसिएशनमुळे मंडपवाल्यांवरील अन्यायाला वाचा फुटेल आणि मंडप व्यावसायिकांना आता गृहीत धरण्याचे प्रकार थांबवा, अशी भूमिका पुणे व पिंपरी-चिंचवड मंडप असोसिएशनच्या वतीने आज झालेल्या बैठकीत घेण्यात आली आहे.
पुणे व पिंपरी-चिंचवड मंडप असोसिएशनच्या वतीने औंध येथील पं. भीमसेन जोशी सभागृहात मंडप व्यावसायिकांच्या बैठकीचे आयोजन करण्यात आले होते. याप्रसंगी संजय कांबळे, महेश देशपांडे, फ्रान्सिस डेव्हिड, नाना कांबळे, दगडे, अशोक ढोरे, अप्पा भूमकर, दिलीप ताटे, राहुल आपटे, विक्रम भोर, सुफियान चौधरी, सचिन भालेराव, राजु चेटीयार आदी मान्यवर उपस्थित होते. दोन्ही शहरांतील मंडप व्यावसायिक मोठ्या संख्येने उपस्थित होते. पुणे व पिंपरी-चिंचवड शहरांत मिळून लहान-मोठे असे सुमारे 4 हजार मंडप व्यावसायिक आहेत.
गणेशोत्सव, नवरात्रोत्सव आणि इतर सण-उत्सवांबरोबरच लग्न व इतर सर्व उपक्रमांना मंडप व्यावसायिकाची गरज भासते. समाजाच्या आनंदाच्या कार्यक्रमांबरोबरच दुःखाच्या कार्यक्रमातही मंडप लागतोच. असे असताना मंडप व्यावसायिकांची अडवणूक करण्याची भूमिका प्रशासन, पोलीस व काही मंडळांकडून का घेतली जाते? असा प्रश्न बैठकीमध्ये उपस्थित करतानाच मंडप व्यावसायिकांनीदेखील आपापसाती मतभेद, स्पर्धा बाजुला ठेवून व्यावसायिक दृष्टीकोनातून काम करण्याची आवश्यकता व्यक्त करण्यात आली.
असोसिएशनच्या माध्यमातून मंडप व्यवसायासाठी लागणाऱ्या साहित्याची खरेदी, पोलीस कारवाई, मनुष्यबळाचा प्रश्न, प्रशासनाची कारवाई याबरोबरच नव्याने वाढत असलेल्या इव्हेंट मॅनेजमेंट व्यवसायामध्ये मंडप व्यावसायिकांचे वाढत असलेले महत्व याविषयी महत्वपूर्ण चर्चा यावेळी करण्यात आली.
