रस्त्यावरील पाव भाजीवाल्यांच्या स्टॉल ला मिळणार संरक्षण ?
पुणे, दि. 3 :- दत्तवाडी वाहतूक विभागांतर्गत सारसबाग खाऊ गल्ली अंतर्गत रोड ते पेशवे पार्क गेट पर्यंत जाणा-या रोडवर दोन्ही बाजूस अत्यावश्यक सेवेतील वाहने उदा. फायरब्रिगेड, पोलीस वाहने, रुग्णवाहिका इत्यादी खेरीज अन्य वाहनांसाठी नो-पार्कींग करण्यात आले असल्याचे आदेश वाहतूक शाखेचे पोलीस उपआयुक्त राहुल श्रीरामे यांनी निर्गमित केले आहेत.
याबाबत नागरिकांच्या काही सूचना व हरकती असल्यास पोलीस उप-आयुक्त, वाहतूक नियंत्रण शाखा, बंगला नं. 6, येरवडा पोस्ट ऑफीसजवळ, पुणे- 6 यांच्या कार्यालयात दिनांक 8 मार्च 2021 पर्यंत लेखी स्वरुपात कळवाव्यात, असेही वाहतूक शाखेचे पोलीस उपआयुक्त राहुल श्रीरामे यांनी प्रसिध्दी पत्रकाद्वारे कळविले आहे.
दरम्यान हा निर्णय घेताना येथील रस्त्यावरील पाव भाजीवाल्यांच्या अतिक्रमणांना संरक्षण मिळेल कि नाही याचा विचार करूनच हा प्रस्ताव केल्याचा आरोप होणार आहे. पण अर्थातच येथील स्टॉल धारक आपली बाजू मांडण्यास अर्थातच पूर्णतः यशस्वी होतील . आणि लोक काही हरकती घेणार नाहीत , घेणारे नाममात्र स्वरूपात घेतील . गेली कित्येक वर्षे येथे स्टॉल च्या पुढे खुर्च्या मांडव टाकून होणार्या अतिक्रमणांवर कारवाई करण्याचेही थांबले आहे. त्यामुळे सुरुवातीला वाहतुकीसाठी खुला असलेले हा रस्ता आता खाऊ गल्लीला बहाल झाल्याचे स्पष्ट होणार आहे. येथे येणाऱ्या नागरिकांना वाहने लावण्यासाठी मात्र पुरेसे वाहनतळ नाही आहे ते अपुरे आहे.आणि आता या रस्त्या ऐवजी पुढील रस्त्याचा वापर येण्या जाण्या साठी करावा असाही प्रस्ताव पुढे आल्यास नवल वाटणार नाही .