पुणे – चौकीदार ही चोर है कोण म्हटले होते. तुम्हीच सांगा, चौकीदार चोर आहे का नाही? मग चोरांच्या टोळीत का सामील झालात,असा सवाल राष्ट्रवादी काँग्रेसच्या खासदार सुप्रिया सुळे यांनी शिवसेनेला विचारला आहे. राज्यात सोमवारी भाजप-शिवसेना युती झाल्यानंतर त्यांनी आज शिवसेनेवर टीका केली. त्या पुण्यामध्ये शिवजयंतीनिमित्त आयोजित मिरवणुकीत सहभागी झाल्या होत्या. यावेळी त्यांनी ही टीका केली.
गेली साडेचार वर्षे एकमेकांचे वस्त्रहरण करणाऱ्यांमध्ये युती झाली. जेव्हा राज्याला चांगल्या प्रशासनाची गरज होती. तेव्हा हे एकमेकांवर टीका करण्यात ‘मश्गुल’ होते. राज्यात भाजप-शिवसेना युती होणे दुर्दैवी असून बाळासाहेब ठाकरे कधी सत्तेसमोर वाकले नसल्याचेही त्या म्हणाल्या.
मी कधी असली विधानं करत नाही, पण चौकीदार ही चोर है कोण म्हटले होते. तुम्हीच सांगा चौकीदार चोर आहे का नाही. मग तुम्ही चोरांच्या टोळीत सामील झालात? याचे उत्तर शिवसेनेने राज्यातील जनतेला द्यावा. युतीमुळे सामान्य कार्यकर्ता भरडला गेला याचे दुःख असल्याचेही त्या म्हणाल्या.