पुणे – भाजपाचे आमदारावर 50 लाख रुपये खंडणी मागितल्या प्रकरणी कोंढवा पोलीस ठाण्यात गुन्हा दाखल झाला आहे. तक्रारीनंतर पोलीसांनी सर्व तपास करुन आमदारावर व त्यांच्या साथीदारावर गुन्हा दाखल केला आहे. परंतु, सत्ताधारी भाजपने या प्रकाराचा योग्य तपास करणाऱ्या कर्तव्यदक्ष पोलीस अधिकाऱ्याची बदली केली. अशा प्रकारे पोलीस अधिकाऱ्यांची बदली करुन गुन्हेगारांना पाठीशी घालणाऱ्या भाजप सरकार विरोधात राष्ट्रवादी कॉंग्रेस व कॉंग्रेस आघाडीच्या वतीने जिल्हाधिकारी कार्यालया समोर शहराध्यक्ष चेतन तुपे पाटील व कॉंग्रेस गटनेते अरविंद शिंदे यांच्या नेतृत्वाखाली निषेध आंदोलन करण्यात आले.
यावेळी बोलताना राष्ट्रवादी कॉंग्रेस पक्षाचे शहराध्यक्ष चेतन तुपे पाटील म्हणाले की, मुख्यमंत्र्यानी पारदर्शक कारभार करावा पुण्यातील भाजप आमदारावर खंडणीचा गुन्हा दाखल करणाऱ्या पोलिस अधिकाऱ्याची केलेली बदली म्हणजे मुख्यमंत्र्याचा पोलिसांच्या कार्यपध्दतीवर विश्वास राहिलेला नाही किंवा त्यांची या प्रकाराला मुक समंती आहे, खंडणीखोरांना व गुन्हेगारांना पाठिशी घालतात, अशी पुणेकरांची भावना आहे. मुख्यमंत्र्याकडे गृहखाते असल्याने त्यांनी पारदर्शकपणे या प्रकरणाचा तपास करावा पुणेकरांच्या मनातील शंका दूर करावी.
त्यानंतर भाजपाने सत्तेचा गैरवापर चालवला असून भाजप आमदारावर व त्याच्या भावावर खंडणीचा गुन्हा दाखल होउन देखील ते मोकाट फिरत आहे. त्यांना ताबडतोब अटक करावी, अशी मागणी कॉंग्रेसचे गटनेते अरविंद शिंदे यांनी केली. या सरकारच्या काळात महिलांवरील अत्याचारात मोठ्या प्रमाणात वाढ झाल्याचे महिलांनी बोलताना सांगितले.
यावेळी नगरसेविका नंदा लोणकर, नितिन कदम, अभय छाजेड, बापू पठारे, प्रशांत जगताप, राकेश कामठे, भोलासिंग अरोरा, बापू डाकले, , वनराज आंदेकर, भैय्यासाहेब जाधव आदी राष्ट्रवादी कॉंग्रेस व कॉंग्रेस आघाडीचे कार्यकर्ते मोठ्या प्रमाणात उपस्थित होते.