पुणे : आपले राजकीय वर्चस्व पुन्हा प्रस्थापित करण्याच्या तयारीला लागलेल्या राष्ट्रवादी कॉंग्रेसने पुण्यात नवी कार्यकारिणी जाहीर केली आहे. पुण्यातील आठ विधानसभा मतदारसंघाची भक्कम बांधणी व्हावी म्हणून राष्ट्रवादीच्या शहराध्यक्षांनी या मतदारसंघांसाठी अध्यक्षांसोबत कार्याध्यक्षही नेमले आहेत.
संघटना मजबूत करण्यासाठी शहराध्यक्ष चेतन तुपेंनी आपली नवी टीम जाहीर केली असून, तीन शहर उपाध्यक्षांसह, आठ मतदारसंघांचे अध्यक्ष, कार्याध्यांच्या नावांची घोषणा केली. तेव्हाच, सामाजिक न्याय आणि “ओबीसी’सेलचे अध्यक्षही निवडले आहेत.
शहर उपाध्यक्षपदावर नारायण गलांडे, शशिकांत तापकीर, आनंद तांबे यांना संधी मिळाली आहे. तर, पर्वती मतदारसंघाच्या अध्यक्षपदाची जबाबदारी नितीन कदम आणि कार्याध्यक्ष म्हणून दिलीप कांबळे यांच्याकडे देण्यात आली आहे. कसब्यासाठी विनायक हणमघर, गणेश नलावडे, तर कोथरुडमध्ये स्वप्नील दुधाणे, नितीन कळमकर यांना संधी दिली आहे. शिवाजीनगरची जबाबदारी माजी नगरसेवक निलेश नीकम, राजेश सानेंकडे दिली आहे.
हडपसर मतरसंघाच्या अध्यक्षपदी नारायण लोणकर आणि कार्याध्यक्ष म्हणून आबा कापरे यांना निवड झाली आहे. खडकवासल्यात माजी नगरसेवक काका चव्हाण आणि संतोष फरांदे यांना संधी मिळाली आहे. वडगावशेरीच्या अध्यक्ष राजेंद्र खांदवे-पाटील, कार्याध्यक्षपदी रमेश आढाव यांची नेमणूक करण्यात आली आहे. पुणे कॅन्टोमेंट मतदारसंघातून भोलासिंग अरोरा आणि कार्याध्यक्ष म्हणून फहिम शेख यांच्या नावांची घोषणा झाली आहे. सामाजिक न्याय विभागाचे अध्यक्षपद विजय डाकले तर, “ओबीस’ विभागाची जबाबदारी संतोष नांगरेंकडे दिली आहे.
नवी कार्यकारिणी जाहीर करताना संघटनेच्या कामाचा अनुभव, शहराच्या प्रश्नांची जाण यांना प्राधान्य दिल्याचे तुपे यांनी सांगितले. केवळ पदे घेऊन मिरविणाऱ्यांना मात्र, कार्यकारिणीपासून लांब ठेवल्याचे दिसून आले. तुपे म्हणाले, “”पुढील निवडणुका जिंकण्यासाठी अभ्यासू कार्यकर्त्यांना संधी दिली आहे. ज्याचा फायदा लोकांचे प्रश्‍न सोडविण्यासाठी होईल. तरुण मतदारांना संघटनेशी जोडण्याचा प्रयत्न असून, त्याकरिता काही जणांना संधी दिली आहे.”
