शिरुर मतदारसंघाचे राष्ट्रवादी काँग्रेसचे खासदार अमोल कोल्हे यांनी आज केंद्रीय गृहमंत्री अमित शहा यांची भेट घेतली. ही भेट राजकीय नसून त्यांचा आगामी काळात येणारा चित्रपट ‘शिवप्रताप गरुडझेप’ यानिमित्ताने घेतल्याचे त्यांनी स्पष्ट केले आहे.औरंगजेबाच्या बलाढ्य सत्तेचा पहारा भेदून केलेल्या छत्रपती शिवाजी महाराजांच्या आग्र्याहून सुटकेच्या प्रसंगाचे जिवंत वर्णन करणारा ‘शिवप्रताप गरुडझेप’ हा चित्रपट आता लवकरच प्रेक्षकांच्या भेटीला येणार आहे. चित्रपटात छत्रपती शिवाजी महाराजांच्या भूमिकेत पुन्हा एकदा डॉ. कोल्हे दिसणार आहेत.
आग्र्याहून सुटकेचा थरार
‘शिवप्रताप-गरुडझेप’ या चित्रपटाचे दिग्दर्शन कार्तिक राजाराम यांनी केले आहे. हा चित्रपट ‘जगदंब क्रिएशन’ प्रस्तुत असणार आहे. मराठी स्वाभिमानाचा अंगार…काल, आज आणि उद्याही असे म्हणत छत्रपती शिवाजी महाराजांच्या आग्र्याहून सुटकेचा थरार मोठ्या पडद्यावर अनुभवता येणार आहे.
खासदार अमोल कोल्हे यांनी अमित शहांची भेट घेतल्यानंतर फोटो आणि एक पोस्ट शेअर करत माहिती दिली आहे. यात त्यांनी लिहिले की, ‘माननीय केंद्रीय गृहमंत्री अमितजी शहा यांची भेट घेऊन शिवप्रताप गरूडझेप सिनेमाची माहिती दिली व दिल्ली येथे मान्यवरांच्या उपस्थितीत स्पेशल स्क्रीनिंगसाठी वेळ देण्याची विनंती केली.
ज्या घटनेने 356 वर्षांपूर्वी देशाचे लक्ष वेधून या मातीला स्वाभिमानाची शिकवण दिली त्या घटनेवर आधारित शिवप्रताप गरूडझेप या सिनेमाने देशाचे लक्ष वेधावे व छत्रपती शिवाजी महाराजांचा इतिहास देशाच्या आणि पर्यायाने जगाच्या कानाकोपऱ्यात पोहोचावा हाच उद्देश! तसेच यानिमित्ताने शिरूर लोकसभा मतदारसंघातील पुणे-नाशिक रेल्वे, शिवसंस्कार सृष्टी आणि इंद्रायणी मेडिसिटी संदर्भातही सकारात्मक चर्चा झाली. माननीय गृहमंत्री महोदयांनी बहुमूल्य वेळ दिल्याबद्दल मनःपूर्वक धन्यवाद!’