पुणे : शहरातील पदपथांवर अडथळा निर्माण करणारे फिडर पिलर्स येत्या एक ते दीड वर्षात हटवावेत व ते योग्य जागी स्थानांतरीत करण्यात यावे असे निर्देश राज्याचे ऊर्जामंत्री चंद्रशेखर बावनकुळे यांनी शुक्रवारी, दि. 26 रोजी पुणे महानगरपालिका व महावितरणच्या वरिष्ठ अधिकाऱ्यांना दिले. यासाठी हवे तर संयुक्त खर्च करा पण ते हत्वा निश्चित असे त्यांनी म्हटले आहे .
येथील सेनापती बापट रस्त्यावरील प्रकाशभवनमध्ये महावितरण व पुणे महापालिकेची समन्वय बैठक आयोजित करण्यात आली. यावेळी महापौर सौ. मुक्ता टिळक, उपमहापौर डाँ. सिद्धार्थ धेंडे, सभागृह नेते श्री. श्रीनाथ भिमाले, स्थायी समितीचे अध्यक्ष श्री. योगेश मुळीक, महाऊर्जाचे अतिरिक्त महासंचालक श्री. पुरुषोत्तम जाधव, महावितरणचे मुख्य अभियंता श्री. सचिन तालेवार, पुणे महानगरपालिकेचे अतिरिक्त आयुक्त श्री. राजेंद्र निंबाळकर, मुख्य अभियंता श्री. श्रीनिवास कंदुल आदींची उपस्थिती होती.
या बैठकीत शहरातील फुटपाथवरील फिडर पिलर्समुळे पादचाऱ्यांना त्रास होत असून अपघाताची शक्यता असल्याची माहिती देण्यात आली. यावर ऊर्जामंत्री ना. श्री. बावनकुळे यांनी महावितरण व महापालिकेने संयुक्तपणे एक समिती स्थापन करून असे धोकादायक ठिकाणांची यादी तयार करावी आणि संयुक्त खर्चाने येत्या एक ते दीड वर्षात ते योग्य जागी स्थानांतरीत करावेत व त्याचा अहवाल वेळोवेळी महापौरांना सादर करण्यात यावा असे निर्देश दिले. तसेच भूमिगत वीजवाहिन्यांसाठी आवश्यक असलेले खोदकाम ही महापालिकेच्या मंजुरीनंतरच करण्यात यावी व ही मंजुरी पालिकेच्या अधिकाऱ्यांनी त्वरित देण्याची कार्यवाही करण्याची सूचना ऊर्जामंत्री ना. श्री. बावनकुळे यांनी केली.
नागरिकांना सुरळीत वीजपुरवठा करा अन्यथा कारवाई – ऊर्जामंत्री
वीजपुरवठा खंडित होऊ नये यासाठी आवश्यक देखभाल व दुरुस्तीचे काम करण्यात यावे व एखाद्या परिसरात वारंवार वीजपुरवठा खंडित होण्याचे प्रकार आढळून आल्यास त्याची जबाबदारी निश्चित करून संबंधित अधिकाऱ्यांविरुद्ध कारवाई करण्याचे निर्देश ऊर्जामंत्री ना. श्री. चंद्रशेखर बावनकुळे यांनी प्रशासनाला दिले. प्रकाशभवन येथे महावितरण व महापारेषणच्या पुणे जिल्ह्यातील कामांचा ऊर्जामंत्री ना. श्री. बावनकुळे यांनी आढावा घेतला. यावेळी त्यांनी सर्वाधिक वीजपुरवठा खंडित होत असलेल्या परिसरांची व विभागांची नावे जाणून घेतली. नागरिकांना सुरळीत वीजपुरवठा देण्यासाठी वीजयंत्रणेवर बारीक लक्ष ठेवावे व खंडित होण्याचे नेमक्या कारणांवर कायमस्वरुपी उपाययोजना करावी. वीजपुरवठा खंडित होण्याचे प्रकार घडल्यास त्याचा कालावधी कमीतकमी राहील याचेही प्रयत्न करण्याची सूचना यावेळी ऊर्जामंत्री ना. श्री. बावनकुळे यांनी दिली. दरम्यान पुणे जिल्ह्यातील महापारेषणच्या विविध उपकेंद्राची सुरु असलेली कामे जलदगतीने पूर्ण करण्यासाठी संबंधीत कंत्राटदारांविरुद्ध कठोर भूमिका घ्यावी. प्रसंगी त्यांना काळ्या यादीत समाविष्ट करून नव्या कंत्राटदारांना कामे देण्याचे निर्देश त्यांनी दिले. यावेळी महावितरणचे मुख्य अभियंता श्री. सचिन तालेवार, श्री. सुनील पावडे, श्री. अनिल भोसले, महापारेषणचे मुख्य अभियंता श्री. रोहीदास मस्के तसेच अधीक्षक अभियंता, कार्यकारी अभियंता उपस्थित होते.
