पुणे : वीजबिलांच्या थकबाकीदार उच्च व लघुदाब वीजग्राहकांविरोधात महावितरणने वीजपुरवठा खंडित करण्याची धडक मोहिम आणखी तीव्र केली आहे. गेल्या पाच दिवसांत पुणे परिमंडलातील 5517 थकबाकीदारांचा वीजपुरवठा खंडित करण्यात आला आहे.
वारंवार पाठपुरावा करूनही थकीत रकमेचा भरणा करण्यास कोणताही प्रतिसाद न देणार्‍या थकबाकीदारांचा वीजपुरवठा खंडित धडक मोहीम पुणे परिमंडलात सुरु आहे. महावितरणच्या विविध कार्यालयांतील अधिकारी व कर्मचार्‍यांसह वरिष्ठ कार्यालयातील अधिकारी व कर्मचार्‍यांची विशेष पथके या मोहिमेत सहभागी झालेले आहेत. याशिवाय तात्पुरता किंवा कायमस्वरुपी वीजपुरवठा खंडित केल्यानंतरही थकबाकीदार अनधिकृतपणे विजेचा वापर करीत असेल तर त्यांच्याविरुद्ध फौजदारी कारवाई करण्याच्या सूचना देण्यात आल्या आहेत. पुणे परिमंडलातील 5517 थकबाकीदारांचा या मोहिमेत 3 कोटी 55 लाख रुपयांच्या थकबाकीपोटी वीजपुरवठा खंडित करण्यात आला आहे.
पुणे परिमंडलातील काही भागात दरमहा वीजबिलांची वसुली ठरवून दिलेल्या उद्दिष्टांपेक्षा कमी झालेली आहे. सद्यस्थितीत महावितरणची आर्थिक परिस्थिती अत्यंत बिकट असून थकबाकी वसुलीशिवाय अन्य कोणताही पर्याय राहिलेला नाही. वसुलीअभावी वीजबिलांच्या थकबाकीत मोठी वाढ होण्याची शक्यता असल्याने थकबाकीदार सर्वच छोट्या-मोठ्या वीजग्राहकांचा वीजपुरवठा खंडित करण्याचे निर्देश देण्यात आले आहेत. थकीत वीजबिलांच्या वसुली कामात हयगय करणार्‍या अधिकार्‍यांविरुद्ध कठोर कारवाई करण्याच्या सूचना मुख्य अभियंता श्री. रामराव मुंडे यांनी संबंधीत अधिकार्‍यांना दिलेल्या आहेत.
चालू व थकीत देयकांचा भरणा करण्यासाठी अधिकृत वीजबील भरणा केंद्गांसह www.mahadiscom.in ही वेबसाईट तसेच मोबाईल अ‍ॅपद्वारे ‘ऑनलाईन’ सोय उपलब्ध आहे. ग्राहकांनी संभाव्य गैरसोय टाळण्यासाठी चालू देयकांचा मुदतीत व मागील महिन्यांतील थकबाकीचा त्वरीत भरणा करावा व वीजपुरवठा खंडित करण्याची कटू कारवाई नाईलाजास्तव करण्यास भाग पाडू नये, असे आवाहन महावितरणने केले आहे.
