कोल्हापुरात महावितरणच्या आंतरपरिमंडलीय नाट्यस्पर्धा !

8 व 9 ऑक्टोबर रोजी केशवराव भोसले नाट्यगृहात होणार प्रयोग

कोल्हापूर – महावितरण पुणे प्रादेशिक विभागांतर्गत यंदाच्या दोन दिवशीय आंतरपरिमंडलीय नाट्यस्पर्धा कोल्हापूर येथे होणार आहेत. कोल्हापुरातील केशवराव भोसले नाट्यगृहात सोमवारी सकाळी पुणे, दुपारी कोल्हापूर तर मंगळवारी बारामती परिमंडल असे एकूण तीन नाट्यप्रयोग सादर होणार असून, नाट्यरसिकांसाठी प्रवेश विनामुल्य असणार आहे.

सोमवारी सकाळी 10.30 वाजता प्रादेशिक संचालक श्री. संजय ताकसांडे यांच्या हस्ते ‘आंतरपरिमंडलीय नाट्यस्पर्धा 2018-19’चे उद्घाटन होणार आहे. त्यानंतर लगेच सकाळी 11 ते 2 या वेळेत पुणे परिमंडलाचे वसंत कानेटकर लिखीत ‘प्रेमात सगळंच माफ’ नाटक सादर होईल. सायंकाळी 5 ते 8 या वेळेत कोल्हापूर परिमंडलाचे शिवाजी देशमुख लिखीत तुफान विनोदी ‘कार्टी नं-1’ हा नाट्यप्रयोग होणार आहे.

मंगळवारी (दि.9) सकाळी 11 ते 2 कालावधीत बारामती परिमंडलाचे प्रा. अनिल सोनार लिखित ‘वाट चुकलेला नवरा’ हे नाटक सादर केले जाणार आहे. त्यानंतर सांस्कृतिक कार्यक्रम होईल. तर सायंकाळी 4.30 वाजता प्रादेशिक संचालक श्री. संजय ताकसांडे यांच्या हस्ते नाट्यस्पर्धेचे पारितोषिक वितरण होईल. यावेळी मुख्य अभियंते श्री. अनिल भोसले (कोल्हापूर), श्री. सचिन तालेवार (पुणे), श्री. सुनिल पावडे (बारामती) यांची प्रमुख उपस्थिती राहणार आहे. नाटकासाठी प्रवेश विनामुल्य असून महावितरण कर्मचारी, त्यांचे कुटुंबीय, निमंत्रित व नाट्यरसिकांनी या संधीचा लाभ घ्यावा असे आवाहन आयोजन समितीतर्फे उपमुख्य औद्योगिक संबंध अधिकारी श्री. शिरीष काटकर, अधीक्षक अभियंते श्री. शैलेंद्र राठोर, श्री. संजय साळे, श्री. मनोज विश्वासे यांनी केले आहे.