पुणे : विविध कारणांमुळे खंडित झालेला वीजपुरवठा तातडीने सुरळीत करण्यासाठी महावितरणच्या अभियंता व कर्मचार्‍यांनी पूर्णपणे सतर्क राहावे असे निर्देश प्रादेशिक संचालक श्री. संजय ताकसांडे यांनी दिले. दरम्यान रोहित्रांची तपासणी करून आवश्यक ठिकाणी वीजसुरक्षेसाठी ताबडतोब उपाययोजना कराव्यात व त्यासाठी निधी उपलब्ध करून देण्यात आलेला आहे असेही त्यांनी सांगितले.
गणेशखिंड येथील ‘प्रकाशभवना’त सोमवारी (दि. 12) पुणे परिमंडलातील विविध कामांची आढावा बैठक झाली. यावेळी प्रादेशिक संचालक श्री. संजय ताकसांडे बोलत होते. पुणे परिमंडलाचे प्रभारी मुख्य अभियंता श्री. सुंदर लटपटे यांची प्रमुख उपस्थिती होती.
प्रादेशिक संचालक श्री. संजय ताकसांडे म्हणाले, की पावसाळ्याला सुरवात झालेली आहे. तांत्रिक किंवा अन्य कारणांमुळे वीजपुरवठा खंडित झाल्यास ग्राहकांची गैरसोय होते व सोबतच महावितरणचेही मोठे आर्थिक नुकसान होते. त्यामुळे खंडित झालेला वीजपुरवठा पर्यायी व्यवस्थेतून किंवा हा पर्याय नसल्यास दुरुस्ती काम करून तातडीने सुरळीत करण्यात यावा. वीजपुरवठा खंडित झाल्यानंतर त्यासंबंधीची माहिती लगेचच संबंधीत वीजग्राहकांना एसएमएसद्वारे उपलब्ध करून देण्यात यावी. त्यामुळे वीजग्राहकांना तक्रार करण्यापूर्वीच वीजपुरवठ्यासंबंधीची माहिती मिळेल.
पुणे परिमंडलात नवीन वीजमीटर मुबलक प्रमाणात उपलब्ध आहेत. त्यामुळे नवीन वीजजोडणी ताबडतोब देण्याचे तसेच नादुरुस्त किंवा जुने इलेक्ट्रो मेकॅनिकल मीटर तातडीने बदलण्याचे निर्देश प्रादेशिक संचालक श्री. संजय ताकसांडे यांनी दिले. उपविभाग कार्यालयांना बिलिंग सुधारणेसाठी सर्व अधिकार देण्यात आले आहेत. अचूक मीटर रिडींगसाठी स्थानिक उपाययोजना कराव्यात तसेच बिलींगबाबत प्राप्त झालेल्या ग्राहकांच्या तक्रारी तत्परतेने सोडविण्याचे निर्देश त्यांनी यावेळी दिले. या बैठकीमध्ये महाव्यवस्थापक (वित्त व लेखा) श्री. अलोक गांगुर्डे, उपमहाव्यवस्थापक (माहिती व तंत्रज्ञान) श्री. एकनाथ चव्हाण, अधीक्षक अभियंता श्री. राजेंद्ग पवार, श्री. शंकर तायडे, श्री. वाडिराज जहागिरदार, श्री. विजय भाटकर, श्री. गौतम गायकवाड आदींसह अभियंते, अधिकारी उपस्थित होते.
खंडित वीजपुरवठ्याच्या कालावधीवर नजर – ज्या भागात वीजपुरवठा सुरळीत करण्यात अनावश्यक किंवा दुर्लक्ष झाल्याचे दिसून आल्यास जबाबदार संबंधीतांवर कारवाई करण्याच्या सूचना प्रादेशिक संचालक श्री. संजय ताकसांडे यांनी केली. प्रादेशिक कार्यालयात 24 तास कार्यरत असणारे नियंत्रण कक्ष सुरु करण्यात आले असून अधीक्षक अभियंता यांच्या नियंत्रणात हा कक्ष काम करणार आहे. जास्त वेळ खंडित राहिलेल्या वीजपुरवठ्यावर या कक्षाची नजर असूून त्यासंबंधीचा अहवाल ताबडतोब वरिष्ठ अधिकार्‍यांना हा कक्ष देत असतो.
