पुणे : मुसळधार व संततधार पावसामुळे वीज वितरण यंत्रणेत एकामागे एक तांत्रिक दोष निर्माण झाल्याने रविवारी (20) पहाटे साडेतीनपासून कोंढवा, वानवडी, घोरपडी, एनआयबीएम रोड परिसरात विस्कळीत झालेला वीजपुरवठा रविवारी मध्यरात्रीपर्यंत टप्प्याटप्प्याने तर काही लघुदाब वाहिन्यांवरील सोसायट्या व वैयक्तिक वीजग्राहकांचा वीजपुरवठा आज दुपारपर्यंत पूर्ववत करण्यात आला.
याबाबत माहिती अशी की, रास्तापेठ विभाग अंतर्गत वानवडी, घोरपडी, जांभूळकर गार्डन, जगताप चौक, फातिमानगर, टिळेकर वस्ती, लुल्लानगर, साळुंके विहार, एनआयबीएम रोड, कोंढवा खुर्द व बुद्गुक या परिसर 22 केव्हीच्या 9 वीजवाहिन्यांद्वारे (फिडर) वीजपुरवठा करण्यात येतो. याच परिसरातील चार स्विचिंग स्टेशनमधील तीन इनकमर वाहिन्यांद्वारे या 9 वीजवाहिन्यांना वीजपुरवठा होतो. परंतु तीनही इनमकर वाहिन्यांमध्ये बिघाड झाल्याने नऊ आऊटगोईंग वीजवाहिन्यांचा वीजपुरवठा बंद झाला आणि वानवडी, कोंढवा व इतर परिसरातील वीजपुरवठा खंडित झाला. त्यातच संततधार व मुसळधार पावसामुळे बर्याच ठिकाणी भूमिगत व काही ठिकाणी ओव्हरहेड असलेल्या या 9 वीजवाहिन्यांवर मोठा परिणाम झाला. फातिमानगर, वानवडी पोलीस चौकीसमोर झाडे पडली. तारा तुटल्या. पावसाचे पाणी साचल्याने 22 केव्हीच्या सुमारे 17 ते 18 फिडर पिलरमध्ये पाणी शिरले. त्यात आर्द्गता (मॉईश्चर) निर्माण झाली. हे सर्व तांत्रिक दोष एकामागे एक होत गेल्याने 9 वाहिन्यांमधील वीज वितरण यंत्रणेत गंभीर बिघाड होत गेला.
खंडित वीजपुरवठा पूर्ववत करण्यासाठी रविवारी (दि. 20) पहाटे पाच वाजेपासूनच सुरवात करण्यात आली. तथापि संततधार पावसामुळे या दुरुस्ती कामात मोठे अडथळे आले. केबल टेस्टींग व्हॅनच्या सहाय्याने भूमिगत वाहिन्यांमधील दोष शोधणे, त्याठिकाणी खोदकाम करणे, वीजवाहिन्यांना जाईंट करणे, मॉईश्चर काढणे, तुटलेल्या तारा जोडणे, पीन इन्सूलेटर बदलणे आदी कामे युद्धपातळीवर व अविश्रांत सुरु करण्यात आली. संततधार पावसात प्रामुख्याने मॉईश्चर काढण्यात मोठे अडथळे आले. इनकमरचे 3 व आऊटगोईंगचे 9 असे एकूण 12 वाहिन्यांची दुरुस्ती करून रविवारी मध्यरात्री 12 ते सोमवारी पहाटे 3 वाजेपर्यंत टप्प्याटप्प्याने बहुतांश भागातील वीजपुरवठा सुरळीत करण्यात आला. परंतु काही ठिकाणी लघुदाब वाहिन्या नादुरुस्त झाल्याने काही सोसायट्या व वैयक्तिक ग्राहकांचा वीजपुरवठा खंडित होता. तो आज दुपारपर्यंत पूर्ववत करण्यात आला. या सर्व दुरुस्ती कामात मुख्य अभियंता श्री. एम. जी. शिंदे, अधीक्षक अभियंता श्री. सुंदर लटपटे, कार्यकारी अभियंता श्री. गणेश एकडे यांच्यासह 15 ते 20 अभियंते व सुमारे 60 तांत्रिक कर्मचारी सहभागी झाले होते.