पुणे : सिंहगड रस्त्यावर पुणे महानगरपालिकेकडून सुरु असलेल्या ड्रेनेजच्या खोदकामात गुरुवारी (दि. 25) सायंकाळी 5 वाजता दोन वीजवाहिन्या तुटल्याने स्वारगेट, पर्वती, सदाशिव पेठ, सहकारनगर आदी परिसरातील सुमारे 23 हजार वीजग्राहकांचा वीजपुरवठा अडीच तासांसाठी खंडित झाला होता.
याबाबत माहिती अशी, की पुणे महानगरपालिकेच्या वतीने सिंहगड रस्त्यावरील पु.ल. देशपांडे उद्यानाजवळ ड्रेनेजसाठी खोदकाम सुरु आहे. यात जेसीबीने महावितरणच्या 22 केव्हीच्या दोन इनकमर वीजवाहिन्या तोडल्याने जुन्या पर्वती उपकेंद्गाचा वीजपुरवठा खंडित झाला. त्यामुळे या उपकेंद्गातून निघणार्या सर्वच 11 वाहिन्यांचाही वीजपुरवठा बंद झाला. परिणामी स्वारगेट, सुभाषनगर, पर्वती गाव, मित्रमंडळ चौक, अरण्येश्वर, सहकारनगर, सदाशिव पेठ, बाजीराव रोड, पर्वती पायथा, विठ्ठलवाडी, जनता वसाहत, वाघजई, दत्तवाडी आदी परिसरातील सुमारे 23 हजार ग्राहकांचा वीजपुरवठा सायंकाळी 5 वाजता खंडित झाला होता.
महावितरणच्या अभियंता व कर्मचार्यांनी तुटलेल्या वीजवाहिन्यांच्या दुरुस्तीचे काम सुरु केले. तुटलेली एक वीजवाहिनी रात्री 7.30 वाजता दुरुस्त केल्यानंतर जुन्या पर्वती उपकेंद्गाच्या 5 वाहिन्यांचा वीजपुरवठा सुरु झाला. याचवेळी पर्यायी व्यवस्थेसाठी इतर कामेही पूर्ण करण्यात आली. त्यामुळे रात्री 7.30 सुमारास जनता वसाहत, वाघजई, विठ्ठलवाडी, सिंहगड रस्त्याचा काही भाग वगळता उर्वरित सर्व भागातील वीजपुरवठा सुरळीत करण्यात आला. त्यानंतर पुन्हा भारव्यवस्थापन करून व पर्यायी व्यवस्थेतून रात्री साडेआठ वाजता जनता वसाहत, वाघजई, विठ्ठलवाडी व सिंहगड रस्त्याच्या परिसरातील वीजपुरवठाही सुरु करण्यात आला.