भाजपची विधानपरिषद उमेदवारांची यादी जाहीर; पुण्यात धक्कातंत्र

पुणे पदवीधरमधून डॉ. स्मिता जाधव, पुणे शिक्षक मतदारसंघातून कौस्तुभ गावडे; नागपूर पदवीधरमधून सुधाकर कोहळे रिंगणात

पुणे : महाराष्ट्र विधानपरिषदेच्या पदवीधर आणि शिक्षक मतदारसंघांच्या निवडणुकीसाठी राजकीय हालचालींना वेग आला असताना भारतीय जनता पक्षाने आपल्या वाट्याला आलेल्या तीन जागांसाठी उमेदवारांची अधिकृत घोषणा केली आहे. पुणे पदवीधर मतदारसंघातून डॉ. स्मिता योगेश जाधव, पुणे शिक्षक मतदारसंघातून कौस्तुभ गावडे, तर नागपूर पदवीधर मतदारसंघातून सुधाकर कोहळे यांना उमेदवारी देण्यात आली आहे.

पुणे पदवीधर मतदारसंघात भाजपने धक्कातंत्र अवलंबल्याची चर्चा आहे. या मतदारसंघातून शरद लाड यांचे नाव दीर्घकाळ चर्चेत होते आणि त्यांनीही निवडणुकीची तयारी सुरू ठेवली होती. मात्र अंतिम क्षणी पक्षाने डॉ. स्मिता जाधव यांच्यावर विश्वास दाखवला. डॉ. जाधव या शिक्षण क्षेत्राशी संबंधित असून पुणे विभागातील पदवीधर मतदारसंघातून भाजपच्या उमेदवार म्हणून आता रिंगणात उतरणार आहेत.

भाजपच्या केंद्रीय निवडणूक समितीने या तिन्ही उमेदवारांच्या नावांना मंजुरी दिल्यानंतर 4 ऑक्टोबर रोजी उमेदवारांची यादी जाहीर करण्यात आली. विधानपरिषदेच्या संबंधित पाच जागांसाठी 23 ऑक्टोबर रोजी मतदान होणार असून 27 ऑक्टोबरला मतमोजणी होणार आहे. उमेदवारी अर्ज दाखल करण्याची अंतिम तारीख 6 ऑक्टोबर, छाननी 7 ऑक्टोबर आणि अर्ज मागे घेण्याची अंतिम तारीख 9 ऑक्टोबर आहे.

पुण्यात दोन्ही उमेदवार कोल्हापूरकडचे

पुणे पदवीधर आणि पुणे शिक्षक या दोन्ही मतदारसंघांसाठी भाजपने कोल्हापूरशी संबंधित उमेदवारांना संधी दिल्याने पक्षाच्या स्थानिक राजकारणातही चर्चा सुरू झाली आहे. पुणे, सातारा, सांगली आणि सोलापूर या जिल्ह्यांतील इच्छुकांकडूनही या मतदारसंघांसाठी दावे होते. त्यामुळे भाजपच्या या ‘कोल्हापूर कार्ड’कडे राजकीय वर्तुळाचे लक्ष लागले आहे.

पुणे शिक्षक मतदारसंघातून कौस्तुभ गावडे

पुणे शिक्षक मतदारसंघातून भाजपने कौस्तुभ गावडे यांना उमेदवारी दिली आहे. गावडे हे शैक्षणिक क्षेत्राशी संबंधित असून त्यांच्या नावासाठी भाजपमधील वरिष्ठ नेत्यांचा आग्रह असल्याची चर्चा आधीपासून सुरू होती.

ही जागा भाजपच्या वाट्याला गेल्यामुळे मात्र महायुतीतील अंतर्गत राजकारण अधिक चुरशीचे झाले आहे. एकनाथ शिंदे यांचे निकटवर्तीय मंगेश चिवटे यांनीही पुणे शिक्षक मतदारसंघातून अर्ज भरण्याचा निर्णय घेतल्याने या जागेवरील महायुतीतील समीकरणांकडे विशेष लक्ष लागले आहे.

नागपूर पदवीधरमध्ये सुधाकर कोहळेंना संधी

भाजपचा पारंपरिक प्रभाव असलेल्या नागपूर पदवीधर मतदारसंघातून माजी आमदार सुधाकर कोहळे यांना उमेदवारी देण्यात आली आहे. या मतदारसंघासाठी माजी आमदार अनिल सोले यांच्या नावाचीही चर्चा होती. मात्र पक्षाने कोहळे यांच्यावर शिक्कामोर्तब केले.

कोहळे यांच्या उमेदवारीनंतर अनिल सोले यांनीही निवडणूक लढवण्याचे संकेत दिल्याने नागपुरातही पक्षांतर्गत बंडखोरीचे सावट निर्माण झाले आहे.

भाजपचे तीन उमेदवार

• पुणे पदवीधर मतदारसंघ — डॉ. स्मिता योगेश जाधव
• पुणे शिक्षक मतदारसंघ — कौस्तुभ गावडे
• नागपूर पदवीधर मतदारसंघ — सुधाकर कोहळे

महायुतीच्या जागावाटपानुसार भाजप तीन जागा लढवत असून उर्वरित दोन जागांपैकी अमरावती शिक्षक मतदारसंघ शिवसेना आणि छत्रपती संभाजीनगर पदवीधर मतदारसंघ राष्ट्रवादी काँग्रेसच्या वाट्याला जाणार आहे. त्यामुळे आता उमेदवारी अर्जांची अंतिम मुदत आणि संभाव्य बंडखोरीनंतरच या निवडणुकीचे अंतिम चित्र स्पष्ट होणार आहे.