बुधवार चौक, लक्ष्मी रस्ता, सेवासदन चौक आणि कुंटे चौक परिसरातील घटना; चार स्वतंत्र गुन्हे दाखल
पुणे : गणेशोत्सव विसर्जन मिरवणूक पाहण्यासाठी मध्यवर्ती पुण्यात झालेल्या मोठ्या गर्दीचा फायदा घेत अज्ञात चोरट्यांनी चार वेगवेगळ्या ठिकाणी नागरिकांच्या गळ्यातील सोन्याचे दागिने चोरल्याच्या घटना उघडकीस आल्या आहेत. या चारही प्रकरणांमध्ये मिळून 4 लाख 480 रुपयांचा ऐवज चोरीला गेला आहे. फरासखाना आणि विश्रामबाग पोलिस ठाण्यात स्वतंत्र गुन्हे दाखल करण्यात आले असून आरोपींचा शोध सुरू आहे.
पहिली घटना 25 सप्टेंबर 2026 रोजी सायंकाळी सुमारे 4 वाजता छत्रपती शिवाजी महाराज रस्ता, बुधवार चौक परिसरात घडली. पोलिसांनी दिलेल्या माहितीनुसार, कर्वेनगर येथे राहणारे 55 वर्षीय फिर्यादी गणेशोत्सव विसर्जन मिरवणूक पाहण्यासाठी उभे होते. त्यावेळी गर्दीचा फायदा घेत अज्ञात व्यक्तीने त्यांच्या गळ्यातील 84 हजार रुपये किमतीची सोन्याची चेन आणि लॉकेट चोरी केले. याप्रकरणी फरासखाना पोलिस ठाण्यात भारतीय न्याय संहितेच्या कलम 303(2) अंतर्गत गुन्हा दाखल करण्यात आला आहे. या प्रकरणाचा तपास पोलीस अंमलदार कव्हळे करीत आहेत.
दुसरी घटना 25 सप्टेंबर रोजी रात्री साडेबारा ते दुपारी 3 या कालावधीत लक्ष्मी रस्त्यावरील गणपती चौकात, रजनीगंधा साडी सेंटरच्या बाहेर घडली. पौड रोड परिसरात राहणारे 45 वर्षीय फिर्यादी, त्यांची पत्नी आणि साक्षीदार विसर्जन मिरवणूक पाहण्यासाठी उभे होते. या गर्दीत अज्ञात व्यक्तीने फिर्यादींच्या पत्नीच्या गळ्यातील मंगळसूत्र तसेच साक्षीदाराच्या गळ्यातील चेन आणि पेंडंट असा एकूण 1 लाख 10 हजार रुपयांचा ऐवज चोरी केला. या प्रकरणी विश्रामबाग पोलिस ठाण्यात गुन्हा क्रमांक 395/2026 नोंदविण्यात आला असून भारतीय न्याय संहितेच्या कलम 303(2) अंतर्गत गुन्हा दाखल करण्यात आला आहे. या प्रकरणाचा तपास पोलीस अंमलदार गोंजारी करीत आहेत.
तिसरी घटना 25 सप्टेंबर रोजी रात्री सुमारे 11 वाजता सेवासदन चौक, लक्ष्मी रस्ता येथे घडली. खराडी येथे राहणारे 29 वर्षीय फिर्यादी विसर्जन मिरवणूक पाहत उभे असताना अज्ञात व्यक्तीने गर्दीचा फायदा घेत त्यांच्या गळ्यातील 1 लाख 18 हजार 480 रुपये किमतीची सोन्याची चेन चोरी केली. याप्रकरणी विश्रामबाग पोलिस ठाण्यात गुन्हा क्रमांक 396/2026 नोंदविण्यात आला असून भारतीय न्याय संहितेच्या कलम 303(2) अंतर्गत गुन्हा दाखल करण्यात आला आहे. या प्रकरणाचा तपास पोलीस अंमलदार कदम करीत आहेत.
चौथी घटना 25 सप्टेंबर रोजी रात्री साडेदहा ते मध्यरात्रीदरम्यान कुंटे चौक, लक्ष्मी रस्ता परिसरात घडली. पौड रोड येथे राहणाऱ्या 42 वर्षीय महिला फिर्यादी आणि त्यांच्यासोबत असलेले साक्षीदार विसर्जन मिरवणूक पाहत असताना अज्ञात चोरट्याने गर्दीचा फायदा घेत फिर्यादींच्या गळ्यातील मंगळसूत्र आणि साक्षीदाराच्या गळ्यातील चेन असा एकूण 88 हजार रुपयांचा ऐवज चोरी केला. याप्रकरणी विश्रामबाग पोलिस ठाण्यात गुन्हा क्रमांक 400/2026 नोंदविण्यात आला असून भारतीय न्याय संहितेच्या कलम 303(2) अंतर्गत गुन्हा दाखल झाला आहे. या प्रकरणाचा तपास पोलीस अंमलदार मुंढे करीत आहेत.
या चारही गुन्ह्यांमध्ये चोरट्यांनी विसर्जन मिरवणुकीतील प्रचंड गर्दीचा फायदा घेत गळ्यातील सोन्याचे दागिने लक्ष्य केल्याचे समोर आले आहे. एकाच दिवशी मध्यवर्ती पुण्यातील बुधवार चौक, गणपती चौक, सेवासदन चौक आणि कुंटे चौक या गर्दीच्या भागांत या घटना घडल्या.
चारही घटनांतील चोरीच्या ऐवजाची एकत्रित किंमत 4 लाख 480 रुपये आहे. त्यामध्ये सोन्याच्या चेन, लॉकेट, मंगळसूत्र आणि पेंडंटचा समावेश आहे. पोलिसांनी चारही प्रकरणांत अज्ञात आरोपींविरुद्ध गुन्हे दाखल केले असून तपास सुरू आहे.
