सीआयडीच्या उपअधीक्षकांच्या तक्रारीवरून आंबेगाव पोलिस ठाण्यात दोन गुन्हे; वरिष्ठ अधिकाऱ्यांची नावे आरोपींच्या यादीत नाहीत
पुणे : खुनाच्या गुन्ह्यात आरोपी असलेल्या अल्पवयीन मुलांना पोलिस वाहनाच्या बोनेटवर बसवून सार्वजनिक रस्त्यावरून नेल्याच्या प्रकरणात भारती विद्यापीठ पोलिस ठाण्यातील वरिष्ठ पोलिस निरीक्षकांसह 18 अधिकारी आणि कर्मचाऱ्यांविरोधात गुन्हा दाखल करण्यात आला आहे. राज्य गुन्हे अन्वेषण विभागाचे (सीआयडी) पोलिस उपअधीक्षक संकेत सतीश गोसावी यांच्या तक्रारीवरून गुरुवारी पहाटे 4.25 वाजता आंबेगाव पोलिस ठाण्यात दोन स्वतंत्र गुन्हे नोंदवण्यात आले.
तक्रारीनुसार, 20 जुलै रोजी खुनाच्या एका गुन्ह्यात काही अल्पवयीन मुलांना ताब्यात घेण्यात आले होते. त्यानंतर 21 जुलै रोजी काही मुलांना पोलिस वाहनाच्या बोनेटवर बसवून, दोरखंडाने बांधून सार्वजनिक रस्त्यावरून नेण्यात आल्याचा आरोप आहे. या प्रकारामुळे संबंधित अल्पवयीन मुलांची ओळख सार्वजनिक झाल्याचेही तक्रारीत नमूद करण्यात आले आहे.यावेळी काही मुलांना जमावाकडून मारहाण झाल्याचा, तसेच पोलिसांच्या ताब्यात असताना काहींना मारहाण करण्यात आल्याचा आरोपही तक्रारीत करण्यात आला आहे. काही अल्पवयीन मुलांना निर्धारित वेळेपेक्षा अधिक काळ पोलिसांच्या ताब्यात ठेवण्यात आल्याचेही नमूद करण्यात आले आहे. हे सर्व आरोप तपासाचा भाग असून त्यांची सत्यता पुढील चौकशीत स्पष्ट होणार आहे.
या प्रकरणाची महाराष्ट्र राज्य मानवी हक्क आयोगाने दखल घेतली होती. आयोगाच्या तथ्यशोधन अहवालातील निरीक्षणे आणि त्यानंतरच्या आदेशांच्या आधारे सीआयडीमार्फत तक्रार दाखल करण्यात आली. भारतीय न्याय संहिता, बाल न्याय कायदा तसेच अनुसूचित जाती-जमाती अत्याचार प्रतिबंधक कायद्यातील संबंधित तरतुदींनुसार गुन्हे नोंदवण्यात आल्याचे सांगण्यात आले.
दरम्यान, पोलिस आयुक्त, पोलिस उपायुक्त आणि सहायक पोलिस आयुक्त यांची नावे या FIRमधील आरोपींच्या यादीत नाहीत. या वरिष्ठ अधिकाऱ्यांनी न्यायालयातून स्थगिती मिळवल्याची माहिती समोर आली आहे. मात्र आदेशाची प्रत उपलब्ध नसल्याने स्थगिती नेमक्या कोणत्या कार्यवाहीला लागू आहे, हे अद्याप स्पष्ट झालेले नाही.
मूळ खुनाच्या गुन्ह्याचा तपास आणि त्यानंतर अल्पवयीन मुलांना पोलिसांकडून कथितरीत्या देण्यात आलेल्या वागणुकीबाबत दाखल करण्यात आलेला गुन्हा ही दोन स्वतंत्र प्रकरणे आहेत. या प्रकरणातील आरोपांबाबत अंतिम निष्कर्ष तपास पूर्ण झाल्यानंतरच समोर येणार आहे.
